नांदेड २४ जुलै (प्रतिनिधी माधव वाघमारे)
गुरुद्वारा सचखंड बोर्ड प्रशासनाकडून सादर करण्यात आलेले अहवाल खोटे आणि दिशाभूल करणारे असल्याचा आरोप करत, बोर्डातील कथित आर्थिक गैरव्यवहार, लेखा विभागातून गायब झालेल्या डोनेशन बुक्स आणि आंदोलकांवर दाखल करण्यात आलेल्या खोट्या गुन्ह्यांविरोधात तक्रारदारांनी तीव्र आक्रमक भूमिका घेतली आहे. या संपूर्ण प्रकरणाची स्वतंत्र उच्चस्तरीय चौकशी करण्यात यावी, अन्यथा २४ जुलै २०२६ रोजी जिल्हाधिकारी कार्यालयासमोर तीव्र ‘लाक्षणिक धरणे आंदोलन’ छेडण्यात येईल, असा अंतिम इशारा जिल्हाधिकाऱ्यांना दिलेल्या निवेदनाद्वारे देण्यात आला आहे.
ही तक्रार अर्जदार स. संपूर्ण सिंग पुरण सिंग गिल आणि स. दीपक सिंग रतन सिंग गल्लीवाले यांनी समस्त साध संगतीच्या वतीने सादर केली आहे.
तक्रारदारांचे मुख्य आरोप आणि निवेदनावर आधारित महत्त्वाचे मुद्दे:
- गायब डोनेशन बुक्स आणि भ्रष्टाचाराचा आरोप:
गुरुद्वारा बोर्डाच्या लेखा (Account) विभागातून अनेक ‘जनरल डोनेशन बुक्स’ गेल्या अनेक महिन्यांपासून गायब आहेत. यापूर्वी डोनेशन विभागातील एका कर्मचाऱ्याने ७ महिन्यांपर्यंत डोनेशन बुक स्वतःकडे ठेवून ४ लाख रुपयांचा अपहार केल्याचे चौकशीत उघड झाले होते. इतका मोठा वित्तीय घोटाळा समोर येऊनही बोर्डाच्या प्रशासकांकडून (Administrator) अद्याप कोणतीही कायदेशीर किंवा दंडात्मक कारवाई करण्यात आलेली नाही, असा गंभीर आरोप तक्रारदारांनी केला आहे. - अधीक्षकांवर गैरवर्तन व जीवे मारण्याची धमकी दिल्याचा आरोप:
दिनांक ०८ जुलै २०२६ रोजी तक्रारदार दीपक सिंग गल्लीवाले हे आंदोलनाबाबतचे अधिकृत पत्र देण्यासाठी गुरुद्वारा गेट नं. १ वर गेले असता, तेथील अधीक्षक रवींद्रसिंग कपूर यांनी त्यांना अत्यंत हीन दर्जाची शिवीगाळ करून जीवे मारण्याची थेट धमकी दिल्याचे निवेदनात नमूद आहे. या प्रकरणी वजिराबाद पोलीस ठाण्यात अ. दखलपात्र गुन्हा (N.C.R. क्र. ०२५४/२०२६) नोंदवण्यात आला आहे. - आंदोलन दडपण्यासाठी खोटी F.I.R. दाखल केल्याचा दावा:
तक्रारदारांच्या मते, २४ जुलै रोजी होणारे शांततापूर्ण धरणे आंदोलन दडपण्याच्या हेतूने प्रशासक विजय सतबीर सिंग आणि अधीक्षक रवींद्रसिंग कपूर यांनी संगनमत करून अवघ्या दोन दिवसांत (१० जुलै २०२६ रोजी) वजिराबाद पोलीस ठाण्यात अर्जदारांविरोधात खोटी एफ.आय.आर. (F.I.R. क्र. ०३५३/२०२६) दाखल केली आहे. - जिल्हाधिकारी कार्यालयाचे थेट वित्तीय व प्रशासकीय नियंत्रण:
गुरुद्वारा सचखंड बोर्डाचे सर्व वित्तीय व्यवहार आणि निधी मंजुरी जिल्हाधिकारी कार्यालयाच्या अंतिम मंजुरीनंतरच पूर्ण होतात. बोर्डावर थेट आर्थिक नियंत्रण असतानाही गायब डोनेशन बुक्स, कोट्यवधी रुपयांची भाडेवसुली थकीत ठेवणे, जीएसटीमधील गैरव्यवहार आणि नियमबाह्य वेतन देणे या बाबी अत्यंत संशयास्पद असल्याचा दावा निवेदनात करण्यात आला आहे.
प्रशासनाला अंतिम इशारा आणि आंदोलनाची तयारी:
शासनाने आणि प्रशासनाने या पत्राची तात्काळ दखल घेऊन चौकशी सुरू न केल्यास पूर्वनियोजित वेळापत्रकानुसार दिनांक २४ जुलै २०२६ रोजी जिल्हाधिकारी कार्यालयासमोर समस्त साध संगतीच्या वतीने तीव्र लाक्षणिक धरणे आंदोलन करण्यात येईल.
या आंदोलनादरम्यान अर्जदारांच्या प्रकृतीला किंवा जीविताला काही अपाय अथवा हानी पोहोचल्यास त्याची संपूर्ण जबाबदारी मा. जिल्हाधिकारी व प्रशासक, अध्यक्ष/अधीक्षक (गुरुद्वारा सचखंड बोर्ड), प्रशासक आणि महाराष्ट्र शासन यांची राहील, असा इशारा निवेदनात शेवटी देण्यात आला आहे.
