स्थानिक गुन्हे शाखेची धडक कारवाई दुचाकी चोरणारी टोळी जेरबंद २ लाख १५ हजार रुपयांच्या ४ गाड्या जप्त

नांदेड  ३ ऑगस्ट (प्रतिनिधी माधव वाघमारे)
नांदेड शहरात आणि जिल्ह्यात दुचाकी चोरी करणाऱ्या गुन्हेगारांविरुद्ध स्थानिक गुन्हे शाखेने (LCB) मोठी कारवाई करत २ आरोपींना अटक केली आहे. आरोपींच्या ताब्यातून एकूण २ लाख १५ हजार रुपये किमतीच्या ४ चोरीच्या मोटारसायकली जप्त करण्यात आल्या आहेत. या कारवाईमुळे वजीराबाद आणि नांदेड ग्रामीण पोलीस ठाण्याच्या हद्दीतील एकूण ४ चोरीचे गुन्हे उघडकीस आले आहेत.

गोपनीय माहिती व तांत्रिक विश्लेषणावरून रचला सापळा

नांदेडचे पोलीस अधीक्षक मा. डॉ. नीलभ रोहन यांनी जिल्ह्यातील मालमत्तेविरुद्धचे गुन्हे उघडकीस आणून गुन्हेगारांना तात्काळ अटक करण्याचे आदेश दिले होते. त्या अनुषंगाने स्थानिक गुन्हे शाखेचे पोलीस निरीक्षक अतुल भोसले यांच्या मार्गदर्शनाखाली पोउपनि नागनाथ तुकडे व त्यांच्या पथकाने गोपनीय माहिती व तांत्रिक विश्लेषणाच्या आधारे तपास चक्रावली.
तपासादरम्यान, आरोपी शिवाजी उर्फ पवन दत्तराम वडजे (वय २३ वर्षे, रा. व्यंकटेशनगर, उमरी) हा चोरीची मोटारसायकल घेऊन शंकरराव चव्हाण उड्डाणपुलाजवळ येणार असल्याची अचूक माहिती पथकाला मिळाली. त्यावरून पोलिसांनी तत्परतेने सापळा रचून त्यास ताब्यात घेतले. त्याच्याकडील मोटारसायकलची पडताळणी केली असता, ती पोलीस ठाणे वजीराबाद (गु.र.नं. २२/२०२६ कलम ३०३ बी.एन.एस.) हद्दीतून चोरीला गेल्याचे निष्पन्न झाले.

शेतातील आखाड्यावर लपवून ठेवल्या होत्या गाड्या

आरोपीकडे कसून चौकशी केली असता, त्याने आपल्या साथीदाराच्या मदतीने इतर मोटारसायकली लपवल्याची कबुली दिली. आरोपी महेश साहेबराव तोडे (वय २२ वर्षे, रा. अंतरगाव, ता. नायगाव, जि. नांदेड) याच्या मदतीने चोरी केलेल्या इतर ३ मोटारसायकली अंतरगाव (ता. नायगाव) येथील शेतातील आखाड्यावर लपवून ठेवल्याचे उघड झाले. पोलिसांनी तात्काळ महेश तोडे यास ताब्यात घेऊन घटनास्थळाची पाहणी केली असता तेथून ३ चोरीच्या मोटारसायकली जप्त करण्यात आल्या.

उघडकीस आलेले गुन्हे व जप्त मुद्देमाल

या कारवाईत जप्त करण्यात आलेल्या २ लाख १५ हजार रुपये किमतीच्या ४ मोटारसायकली खालील गुन्ह्यांशी संबंधित आहेत:
१) पोलीस ठाणे वजीराबाद – गु.र.नं. ३७८/२०२३ कलम ३७९ IPC
२) पोलीस ठाणे वजीराबाद – गु.र.नं. ४६१/२०२३ कलम ३७९ IPC
३) पोलीस ठाणे नांदेड ग्रामीण – गु.र.नं. ९२८/२०२४ कलम ३०३(२) बी.एन.एस.
४) पोलीस ठाणे नांदेड ग्रामीण – गु.र.नं. ४०३/२०२३ कलम ३७९ IPC
अटक करण्यात आलेल्या दोन्ही आरोपींनी संबंधित गुन्ह्यांची कबुली दिली असून आरोपी व जप्त केलेला मुद्देमाल पुढील कायदेशीर कारवाईसाठी संबंधित पोलीस ठाण्यांच्या स्वाधीन करण्यात आला आहे.

कारवाई करणारे पथक

ही उल्लेखनिय कारवाई नांदेडचे पोलीस अधीक्षक मा. डॉ. नीलभ रोहन यांच्या आदेशाने स्थानिक गुन्हे शाखेचे पोलीस निरीक्षक अतुल भोसले यांच्या नेतृत्वाखाली पोउपनि नागनाथ तुकडे, पोलीस अंमलदार दारासिंग राठोड, मोहन हाक्के, महेश बडगु, लहू चाटे आणि आबाराव पिंगलवाड यांनी यशस्वीरीत्या पार पाडली.