झुलेलाल मंदिर भवन येथे सुरू असलेल्या तिरट जुगार अड्ड्यावर धाड ५ जणांना अटक ३.५५ लाखांचा मुद्देमाल जप्त

नांदेड  ३ ऑगस्ट (प्रतिनिधी माधव वाघमारे)
नांदेड शहरात अवैध धंद्यांविरुद्ध पोलीस प्रशासनाने आक्रमक पवित्रा घेतला असून, वजीराबाद पोलीस ठाण्याच्या हद्दीतील अबचलनगर परिसरात सुरू असलेल्या एका तिरट जुगार अड्ड्यावर वजीराबाद गुन्हे शोध पथकाने छापा मारून मोठी कारवाई केली आहे. या कारवाईत ५ आरोपींना रंगेहात पकडण्यात आले असून, त्यांच्याकडून रोख रक्कमेसह तब्बल ३ लाख ५५ हजार ३०० रुपयांचा मुद्देमाल जप्त करण्यात आला आहे.

गुप्त बातमीदाराच्या माहितीवरून छापा

मिळालेल्या सविस्तर माहितीनुसार, नांदेड जिल्ह्याचे पोलीस अधीक्षक मा. डॉ. नीलाभ रोहन यांच्या आदेशानुसार जिल्ह्यात अवैध धंद्यांविरुद्ध विशेष मोहीम राबवली जात आहे. यादरम्यान दि. ०२ ऑगस्ट २०२६ रोजी सायंकाळच्या सुमारास वजीराबाद गुन्हे शोध पथकातील पोउपनि/सुनील बुलंगे व त्यांचे पथक गस्त घालत असताना त्यांना बातमीदाराकडून गुप्त माहिती मिळाली की, अबचलनगर येथील झुलेलाल मंदिर भवन, रूम क्रमांक ३०९ मध्ये काही इसम पैशांवर ‘तिरट’ नावाचा जुगार खेळत आहेत.
मिळालेल्या माहितीची खातरजमा करून पोलीस पथकाने पंचांसह तात्काळ घटनास्थळी धाड टाकली. तेथे पाच जण गोलाकार बसून पैशांवर तिरट जुगार खेळताना आढळून आले.

अटक करण्यात आलेले आरोपी

१. रवी पेगाजी गवळे (वय ४१ वर्षे, रा. गुरुवार बाजार, सिडको, नांदेड)
२. विकास रामराव सरपोत (वय ३५ वर्षे, रा. गुरुवार बाजार, सिडको, नांदेड)
३. मुकेश पांडुरंग लोळगे (वय ३६ वर्षे, रा. भोजालाल गवळी चौक, नांदेड)
४. चंद्रशेखर गणपतराव पवार (वय ३३ वर्षे, रा. सिडको, नांदेड)
५. अतुल भगवानराव वाडे (वय ३७ वर्षे, रा. गुरुवार बाजार, सिडको, नांदेड)

जप्त करण्यात आलेला मुद्देमाल (एकूण: ₹३,५५,३००/-)

• रोख रक्कम: ₹२५,३००/-
• जुगाराचे साहित्य: बदक छाप पत्ते
• मोबाईल फोन: विविध कंपन्यांचे ०५ मोबाईल (अंदाजे किंमत ₹१,१०,०००/-)
• वाहने: ०४ दुचाकी वाहने (अंदाजे किंमत ₹२,२०,०००/-)

गुन्हा दाखल व पुढील तपास

पोलीस पथकाने पंचांसमक्ष अंगझडती आणि घटनास्थळाचा पंचनामा करून सर्व मुद्देमाल जप्त केला आहे. याप्रकरणी वजीराबाद पोलीस ठाण्यात गु.र.नं. ३९१/२०२६ अन्वये महाराष्ट्र जुगार प्रतिबंधक अधिनियम, कलम ४ व ५ प्रमाणे गुन्हा दाखल करण्यात आला असून पुढील तपास वजीराबाद पोलीस ठाणे करीत आहे.

कारवाई करणारे पोलीस पथक

ही यशस्वी कारवाई पोलीस अधीक्षक मा. डॉ. नीलाभ रोहन यांच्या आदेशाने सहा. पोनि/लोंढे, पोउपनि/सुनील बुलंगे व गुन्हे शोध पथकातील पोलीस अंमलदार गणेश धुमाळ, विलास कदम, ज्वालासिंग बावरी, इम्रान पठाण, संतोष पोकळे, किशोर जयस्वाल (सर्व नेमणूक पोलीस स्टेशन वजीराबाद) यांनी पार पाडली.

नागरिकांना आवाहन:
नांदेड जिल्हा पोलीस दलातर्फे नागरिकांना आवाहन करण्यात आले आहे की, आपल्या परिसरात कोणत्याही प्रकारचा अवैध जुगार, मटका किंवा तत्सम बेकायदेशीर प्रकार सुरू असल्यास तात्काळ जवळच्या पोलीस ठाण्यास किंवा पोलीस नियंत्रण कक्षास माहिती द्यावी. अशा अवैध धंद्यांवर कठोर कारवाई सुरूच राहील.