दुष्काळसदृश्य परिस्थितीत
नांदेड १७ सप्टेंबर (प्रतिनिधी: माधव वाघमारे)
जिल्ह्यात निर्माण झालेल्या दुष्काळसदृश्य परिस्थितीत राज्य शासन नांदेड जिल्ह्यातील शेतकऱ्यांच्या पाठीशी खंबीरपणे उभे आहे. जिल्ह्यातील बाधित शेतकऱ्यांना सर्वतोपरी मदत मिळवून देण्यासाठी शासनस्तरावर तीव्र पाठपुरावा केला जाईल, अशी ग्वाही जिल्ह्याचे पालकमंत्री तथा इतर मागास बहुजन कल्याण, दुग्धविकास, अपारंपरिक ऊर्जा व दिव्यांग कल्याण मंत्री अतुल सावे यांनी दिली.
जिल्हाधिकारी कार्यालयात आयोजित बैठकीत पालकमंत्री अतुल सावे यांनी नांदेड जिल्ह्यातील पीक परिस्थिती, पर्जन्यमान, पाणीसाठा आणि वीजपुरवठ्याचा सविस्तर आढावा घेतला. या बैठकीस जिल्हाधिकारी राहुल कर्डिले, जिल्हा परिषदेचे मुख्य कार्यकारी अधिकारी महेश पाटील, जिल्हा पोलीस अधीक्षक डॉ. नीलाभ रोहन यांच्यासह विविध प्रशासकीय विभागांचे प्रमुख अधिकारी उपस्थित होते.
पिकांचे नुकसान व उपाययोजनांचा आढावा पावसाचा दीर्घ खंड आणि अनियमिततेमुळे जिल्ह्यातील सोयाबीन, कापूस आणि तूर या मुख्य पिकांना मोठा फटका बसला असून पिकांची वाढ खुंटली आहे. या संभाव्य पिकांच्या नुकसानीचा आढावा घेत पालकमंत्र्यांनी प्रशासनाला शासनाकडे वस्तुनिष्ठ माहिती तात्काळ सादर करण्याचे निर्देश दिले.
पालकमंत्री व जिल्हाधिकाऱ्यांनी दिलेल्या महत्त्वाच्या सूचना व सादरीकरण:
- परस्पर समन्वय: दुष्काळसदृश्य परिस्थितीचा सामना करण्यासाठी सर्व संबंधित विभागांनी आपापसांत समन्वय ठेवून आत्तापासूनच ठोस नियोजन करावे.
- पाणीसाठा व पिण्याचे पाणी: धरणांतील उपलब्ध पाणीसाठ्याचा आढावा घेऊन पिण्याच्या पाण्याचे काटकसरीने नियोजन करावे, जेणेकरून भविष्यात टंचाई भासणार नाही.
- जिल्हा प्रशासनाची तयारी: जिल्हाधिकारी राहुल कर्डिले यांनी जिल्ह्यातील पाणी आराखडा, चारा लागवड, के.टी. वेअर बंधारे आणि नियमित वीजपुरवठ्याबाबत प्रशासनातर्फे करण्यात येत असलेल्या पूर्वतयारीची माहिती पालकमंत्र्यांना दिली.
शेतकऱ्यांना व नागरिकांना या कठीण प्रसंगात कोणतीही अडचण येऊ नये यासाठी सर्व यंत्रणांनी तत्परतेने काम करावे, अशा सूचना देऊन पालकमंत्र्यांनी जिल्ह्यातील जनतेला दिलासा दिला.
