घरफोडी करणाऱ्या टोळीचा पर्दाफाश ७३,७०० रुपयांच्या मुद्देमालासह दोन आरोपी जेरबंद

नांदेड २७ जून प्रतिनिधी
नांदेड शहरात घरफोडी करून धुमाकूळ घालणाऱ्या अट्टल चोरांच्या मुसक्या आवळण्यात स्थानिक गुन्हे शाखा (LCB) पोलिसांना मोठे यश आले आहे. दोन वेगवेगळ्या घरफोडीच्या गुन्ह्यांतील २ आरोपींना पोलिसांनी अटक केली असून, त्यांच्याकडून सोन्या-चांदीचे दागिने आणि रोख रकमेसह एकूण ७३,७०० रुपयांचा मुद्देमाल जप्त करण्यात आला आहे.

गुप्त माहितीच्या आधारे सापळा रचून कारवाई

नांदेडचे पोलीस अधीक्षक डॉ. नीलाभ रोहन यांनी जिल्ह्यातील चोरी व घरफोडीच्या गुन्ह्यांची उकल करण्याचे आदेश स्थानिक गुन्हे शाखेला दिले होते. त्यानुसार, गुन्हे शाखेचे पोलीस निरीक्षक अतुल भोसले यांच्या मार्गदर्शनाखाली पोलीस उपनिरीक्षक साईनाथ पुयड आणि त्यांच्या पथकाने तपास सुरू केला.
दिनांक २६ जून २०२६ रोजी पोलीस उपनिरीक्षक साईनाथ पुयड यांचे पथक नांदेड शहरातील शंकरराव चव्हाण चौक बायपास रोड परिसरात गस्तीवर होते. याच दरम्यान त्यांना बोँढारकडे जाणाऱ्या रोडवरील ‘इरफान टायर वर्क्स’ दुकानाजवळ दोन संशयित तरुण थांबल्याची गोपनीय माहिती मिळाली. माहिती मिळताच पोलिसांनी तात्काळ घटनास्थळी धाव घेऊन सापळा रचला आणि दोघांना ताब्यात घेतले.

अटक करण्यात आलेले आरोपी

१. शेख रेहान उर्फ चिल्ला शेख महेबुब (वय २१ वर्षे, रा. मिलतनगर गल्ली नं. ३, नांदेड)
२. मोहम्मद रेहान उर्फ रिझवान उर्फ पुष्पा मोहम्मद ईलियास (वय २० वर्षे, रा. मिलतनगर गल्ली नं. ७, नांदेड)

चोरीची कबुली आणि मुद्देमाल जप्त

पोलिसांनी संशयितांची अंगझडती घेतली असता त्यांच्याकडे सोन्या-चांदीचे दागिने आणि नगदी रक्कम आढळून आली. पोलिसी खाक्या दाखवताच त्यांनी त्यांच्या आणखी एका साथीदारासह काही दिवसांपूर्वी मेहबुबनगर व ओमकारेश्वर नगर येथील दोन बंद घरे फोडल्याची कबुली दिली. घरातील कपाटाचे कडी-कोंडा तोडून त्यांनी हे दागिने आणि पैसे चोरले होते. चोरीचा हा मुद्देमाल आज बाजारात विकून पैसे आपापसात वाटून घेण्याच्या तयारीत असतानाच ते पोलिसांच्या जाळ्यात अडकले. आरोपींकडून ७३,७०० रुपये किमतीचे दागिने व रोकड जप्त करण्यात आली असून, पुढील तपासासाठी त्यांना विमानतळ पोलीस स्टेशनच्या ताब्यात देण्यात आले आहे.

वरिष्ठांकडून कौतुक

ही धडक कारवाई पोलीस अधीक्षक डॉ. नीलाभ रोहन, अपर पोलीस अधीक्षक अर्चना पाटील (भोकर) आणि अपर पोलीस अधीक्षक सूरज गुरव यांच्या मार्गदर्शनाखाली पार पडली. या कारवाईत पो.कॉ. इम्रान शेख, प्रमोद जाँधळे, बालाजी कदम, संदीप घोगरे, संतोष बेल्लुरोड, महेश बडगु, पोहेकॉ. गोविंद येईलवाड, उमर शेख आणि सायबर सेलचे पोहेकॉ. राजू सिटीकर, दिपक ओढणे यांनी महत्त्वाची भूमिका बजावली. या उल्लेखनीय कामगिरीबद्दल पोलीस अधीक्षकांनी संपूर्ण पथकाचे कौतुक केले आहे.
वृत्त संकलन
प्रतिनिधी: माधव वाघमारे, नांदेड