नांदेड २६ जून ( प्रतिनिधी)
नांदेड जिल्ह्यामध्ये अवैध मार्गाने गोवंशीय जनावरांची वाहतूक व कत्तल करणाऱ्यांविरुद्ध नांदेड पोलिसांनी मोठी कारवाई केली आहे. स्थानिक गुन्हे शाखेच्या (LCB) पथकाने देगलूर नाका परिसरात छापा टाकून अवैध वाहतूक केली जाणारी १० बैल आणि शेडमध्ये कत्तलीच्या उद्देशाने डांबून ठेवलेली ८ बैल व १ गाय अशी एकूण १९ गोवंशीय जनावरे जप्त केली आहेत. या कारवाईत जनावरांसह वाहतुकीसाठी वापरलेले आयशर वाहन आणि असा एकूण २२,६०,००० रुपयांचा मुद्देमाल जप्त करण्यात आला आहे.
गुप्त बातमीदाराकडून मिळाली माहिती
नांदेडचे पोलीस अधीक्षक मा. श्री. डॉ. नीलाभ रोहन यांनी स्थानिक गुन्हे शाखेचे पोलीस निरीक्षक श्री. अतुल भोसले यांना जिल्ह्यातील अवैध गोवंश वाहतुकीवर कडक कारवाई करण्याचे आदेश दिले होते. त्यानुसार, दिनांक २६/०६/२०२६ रोजी एलसीबीचे पथक इतवारा भागात पेट्रोलिंग करत असताना, देगलूर नाका येथे गुप्त बातमीदाराकडून एक महत्त्वाची माहिती मिळाली. गाडेगाव रोडवरील मल शुद्धीकरण केंद्रासमोरील रोडवर आणि इकबालनगर पाण्याच्या टाकीजवळील एका शेडमध्ये कत्तल करण्याच्या उद्देशाने गोवंशीय जनावरे आयशर टेम्पोमध्ये भरली जात असल्याची खात्रीशीर माहिती पोलिसांना मिळाली.
भरसकाळी पोलिसांचा छापा
माहिती मिळताच स्थानिक गुन्हे शाखेच्या पथकाने दिनांक २६/०६/२०२६ रोजी सकाळी ०८:४५ वाजेच्या सुमारास मिळालेल्या ठिकाणी तात्काळ छापा टाकला. या कारवाईत आयशर टेम्पोमध्ये अवैध रित्या वाहतूक केली जाणारी १० बैल मिळून आली. तसेच, मोहम्मद सादिक अब्दुल गफूर यांच्या शेडची तपासणी केली असता, तेथे कत्तल करण्याच्या उद्देशाने बांधून ठेवलेली आणखी ०८ बैल आणि ०१ गाय मिळून आली.
४ आरोपी ताब्यात; गुन्ह्याची नोंद
या प्रकरणी पोलिसांनी घटनास्थळावरून ४ आरोपींना ताब्यात घेतले आहे:
१) झबीउल्लाखान जहीरउल्लाखान (वय ३० वर्षे, चालक, रा. ईदगाह जवळ, नांदेड)
२) शेख कलीम ऊर्फ कल्यु शेख अहमद (वय ३५ वर्षे, रा. हबीबीयाँ कॉलनी, खुदाबेईनगर, नांदेड)
३) मोहम्मद सादिक अब्दुल गफूर (वय ४८ वर्षे, रा. बाराईमाम चौक, मन्यार गल्ली, इतवारा, नांदेड)
४) मोहमद रिजवान मोहमद जाफर (वय ३० वर्षे, रा. उमर कॉलनी, टायरबोर्ड, नांदेड)
या सर्व आरोपींविरुद्ध नांदेड ग्रामीण पोलीस ठाण्यात महाराष्ट्र प्राणी संरक्षण अधिनियम १९७६ चे कलम ५ (अ), ५(ब), ९(अ), प्राण्यांचा छळ प्रतिबंधक अधिनियम १९६० चे सहकलम ११(१), (ड) आणि भारतीय न्याय संहिता २०२३ च्या कलम ३(५) अन्वये गुन्हा (गु.र.नं. ७६७/२०२५) दाखल करण्यात आला असून पुढील तपास सुरू आहे.
जप्त करण्यात आलेला मुद्देमाल:
- आयशर वाहन (क्र. MH 26-BE-4946): किंमत रु. ११,००,०००/-
- १९ गोवंशीय जनावरे (१८ बैल, ०१ गाय): किंमत रु. ११,६०,०००/-
- एकूण जप्त मुद्देमाल: रु. २२,६०,०००/-
या अधिकाऱ्यांच्या मार्गदर्शनाखाली झाली कारवाई
ही धडक कारवाई नांदेडचे पोलीस अधीक्षक मा. श्री. डॉ. नीलाभ रोहन, अप्पर पोलीस अधीक्षक (भोकर) मा. श्रीमती अर्चना पाटील, आणि अप्पर पोलीस अधीक्षक (नांदेड) मा. श्री. सुरज गुरव यांच्या मार्गदर्शनाखाली स्थानिक गुन्हे शाखेचे पोलीस निरीक्षक श्री. अतुल भोसले, पोलीस उपनिरीक्षक नागनाथ तुकडे, मिलिंद सोनकांबळे आणि पोलीस अंमलदार दारासिंग राठोड, मोहन हाक्के (पोहेकॉ/६६४), सुनिल गंटलेवार, रविकंर बामणे, आबाराव पिंगलवाड, चंद्रकांत स्वामी, शेख अझहरोद्दीन व अनिल बिरादार यांच्या पथकाने यशस्वीरित्या पार पाडली.
या उल्लेखनीय कामगिरीबद्दल पोलीस अधीक्षक महोदयांनी संपूर्ण पोलीस पथकाचे कौतुक करून अभिनंदन केले आहे.
– बातमी प्रतिनिधी: माधव वाघमारे
