नांदेड २६ ऑगस्ट (प्रतिनिधी माधव वाघमारे)
शहरात मॉडिफाईड सायलेन्सर बसवून कर्णकर्कश आवाज करणाऱ्या आणि निष्काळजीपणे दुचाकी चालवून नागरिकांच्या जीवितास धोका निर्माण करणाऱ्या बेशिस्त वाहनधारकांविरुद्ध नांदेड ग्रामीण पोलिसांनी कारवाईचा बडगा उचलला आहे.
पोलीस अधीक्षक मा. डॉ. नीलाभ रोहन यांच्या आदेशान्वये शहरात सायलेन्सरचा त्रासदायक आवाज करणाऱ्या वाहनांवर विशेष मोहीम राबवली जात आहे. याच अनुषंगाने दि. २६ ऑगस्ट २०२६ रोजी सकाळी नांदेड ग्रामीण पोलीस ठाण्याचे कर्मचारी खुदबे नगर चौक परिसरात गस्त घालत असताना, काही दुचाकीस्वार वाहनांचे मूळ सायलेन्सर काढून मोठा फडफड आवाज करत आणि भरधाव वेगाने दुचाकी चालवत असल्याचे पोलिसांच्या निदर्शनास आले.
पोलिसांनी या दुचाकींची तपासणी केली असता वाहनधारकांकडे कोणतीही आवश्यक कागदपत्रे आढळली नाहीत. या कारवाईदरम्यान एकूण ७ दुचाकी जप्त करण्यात आल्या. यामध्ये वाहने (MH 38 AB 8493, MH 26 DU 7738, MH 26 CX 1374, MH 26 CF 5171, MH 26 AZ 2371, MH 26 5228 आणि एक विना क्रमांकाची लाल रंगाची ग्लॅमर मोटारसायकल) यांचा समावेश आहे. यातील काही दुचाकीस्वार अल्पवयीन असल्याचे निष्पन्न झाले असून दोन दुचाकीस्वार आपल्या गाड्या घटनास्थळी सोडून पसार झाले.
याप्रकरणी पोलीस अंमलदार बालाजी मारोतीराव दंतापल्ले यांच्या फिर्यादीवरून नांदेड ग्रामीण पोलीस ठाण्यात गुन्हा रजि. क्र. १०४७/२०२६, कलम २८१, १२५ भारतीय न्याय संहिता अन्वये गुन्हा दाखल करण्यात आला आहे.
नांदेड पोलिसांचे आवाहन: वाहनांमध्ये अनधिकृत बदल करून कर्णकर्कश आवाज निर्माण करणे, बेदरकारपणे वाहने चालवणे आणि वाहतुकीचे नियम मोडणे टाळावे. अशा प्रकारे सार्वजनिक सुरक्षेला धोका निर्माण करणाऱ्यांवर यापुढेही कठोर कायदेशीर कारवाई केली जाईल, असा इशारा जिल्हा पोलिसांनी दिला आहे.
