नांदेड ३ एप्रिल प्रतिनिधी माधव वाघमारे
अवैध सावकारीचा व्यवसाय करून कर्जदारांना डांबून ठेवणे आणि त्यांच्याकडे खंडणी मागणाऱ्या एका सराईत टोळीचा नांदेड पोलिसांनी पर्दाफाश केला आहे. स्थानिक गुन्हे शाखेच्या पथकाने अत्यंत वेगाने चक्रे फिरवत या गुन्ह्यातील पाच आरोपींना अवघ्या तीन तासांच्या आत अटक केली आहे. या कारवाईमुळे नांदेड शहरातील अवैध सावकारी करणाऱ्यांचे धाबे दणाणले आहेत.
नेमकी घटना काय?
मिळालेल्या माहितीनुसार, नांदेड शहरातील ‘खालसा फायनान्स’ आणि ‘गुरुकृपा ट्रेडर्स’ या नावाने खाजगी फायनान्स चालवणारे काही तरुण अवैध सावकारी करत होते. पीरबुर्हाण येथील आबेद अली चाऊस यांनी घेतलेल्या कर्जाची वसुली करण्यासाठी या टोळीने २८ मार्च रोजी त्यांच्या घरात घुसून त्यांना जबरीने मोटारसायकलवर बसवून नेले. आरोपींनी त्यांना कार्यालयात डांबून ठेवून बेदम मारहाण केली आणि पैशांसाठी खंडणीची मागणी केली. असाच प्रकार अर्धापूर येथील समाधान जोंधळे यांच्यासोबतही घडला होता.
पोलिसांची गनिमी कावा अन् कारवाई
नांदेडचे पोलीस अधीक्षक अविनाश कुमार यांनी रात्रीच्या गस्तीदरम्यान गुन्हेगारांवर कडक कारवाई करण्याचे आदेश दिले होते. दरम्यान, ३ एप्रिल रोजी पहाटेच्या सुमारास स्थानिक गुन्हे शाखेचे पोलीस उपनिरीक्षक महेश कोरे व त्यांच्या पथकाला खात्रीशीर बातमी मिळाली की, साठे चौकातील एका कार्यालयाबाहेर काही संशयित तरुण थांबलेले आहेत. पोलिसांनी तातडीने सापळा रचून या तरुणांना ताब्यात घेतले.
अटक करण्यात आलेले आरोपी:
१. मजहर खान नवीद खान (वय ३८, रा. नुरी चौक)
२. अभिजीत प्रकाश सुर्यवंशी (वय १८, रा. विष्णुनगर)
३. सुमित रामदास ढवळे (वय २२, रा. संघसेन नगर)
४. अभय गौतम भुजबळे (वय १९, रा. किल्लारोड)
५. अनिकेत राजु हिरापुरम (वय १८, रा. नारायण नगर)
याशिवाय या गुन्ह्यात सामील असलेले सोहेल खान, सय्यद आझम, शुभम कांबळे, मॉन्टीसिंग मेजर आणि एका विधीसंघर्ष ग्रस्त बालकासह इतर पाच जणांचा शोध पोलीस घेत आहेत.
कडक कलमान्वये गुन्हे दाखल
या प्रकरणी भाग्यनगर पोलीस ठाण्यात गु.र.नं. १६८/२०२६ आणि अर्धापूर पोलीस ठाण्यात गु.र.नं. १७१/२०२६ नुसार भारतीय न्याय संहिता व महाराष्ट्र सावकारी अधिनियम कलम ३९ अन्वये गुन्हे दाखल करण्यात आले आहेत. आरोपींकडे चौकशी केली असता त्यांनी गुन्ह्याची कबुली दिली आहे.
ही यशस्वी कारवाई पोलीस अधीक्षक अबिनाश कुमार, अप्पर पोलीस अधीक्षक अर्चना पाटील (भोकर), अप्पर पोलीस अधीक्षक सुरज गुरव यांच्या मार्गदर्शनाखाली स्थानिक गुन्हे शाखेचे पोलीस निरीक्षक उदय खंडेराय, उपनिरीक्षक महेश कोरे, साईनाथ पुयड आणि त्यांच्या पथकाने केली आहे. या धडाकेबाज कामगिरीबद्दल पोलीस अधीक्षकांनी पथकाचे कौतुक केले आहे.
