नांदेड ७ जुलै प्रतिनिधी
०८७ नांदेड दक्षिण विधानसभा मतदारसंघांतर्गत आजपासून ‘विशेष सखोल मतदार यादी पुनरीक्षण’ (S.I.R.) मोहिमेला मोठ्या उत्साहात सुरुवात झाली आहे. मतदारसंघातील सर्व मतदान केंद्रनिहाय विशेष शिबिरांचे (कॅम्प) आयोजन करण्यात आले असून, हडको येथील फिरदोस मशीद परिसरात लागलेल्या शिबिराला नागरिकांनी उत्स्फूर्त प्रतिसाद दिला.
मतदार यादी अधिकाधिक अचूक, पारदर्शक आणि अद्ययावत करण्याच्या उद्देशाने निवडणूक प्रशासनातर्फे ही विशेष मोहीम हाती घेण्यात आली आहे. पहिल्याच दिवशी नवमतदार तसेच यादीत दुरुस्ती करू इच्छिणाऱ्या पात्र नागरिकांनी आवश्यक कागदपत्रांची पूर्तता करण्यासाठी आणि ‘EF फॉर्म’ भरून देण्यासाठी शिबिरांमध्ये मोठी गर्दी केली होती.
वरिष्ठ अधिकाऱ्यांकडून कामकाजाची पाहणी
या मोहिमेच्या गांभीर्याची दखल घेत वरिष्ठ महसूल व निवडणूक अधिकाऱ्यांनी थेट मतदान केंद्रांवर जाऊन प्रत्यक्ष कामकाजाची पाहणी केली. नांदेडचे उपविभागीय अधिकारी तथा मतदार नोंदणी अधिकारी डॉ. सचिन खल्लाळ, तहसीलदार तथा सहाय्यक मतदार नोंदणी अधिकारी संजय वारकड आणि सहाय्यक मतदार नोंदणी अधिकारी अविनाश शिंगारे यांनी हडको येथील फिरदोस मशीद परिसरातील कॅम्पला भेट दिली.
अधिकाऱ्यांनी तेथे उपस्थित असलेले कर्मचारी, मतदान केंद्रस्तरीय अधिकारी (BLO) आणि नागरिकांशी थेट संवाद साधला. मतदार नोंदणीची ही संपूर्ण प्रक्रिया अत्यंत पारदर्शक, अचूक आणि वेळेत पूर्ण करण्याचे निर्देश त्यांनी कर्मचाऱ्यांना दिले.
‘डिजिटायझेशनचा वेग वाढवा’
नोंदणी प्रक्रियेत कोणताही विलंब होऊ नये म्हणून डॉ. सचिन खल्लाळ यांनी ‘EF फॉर्म’चे वाटप, त्याचे संकलन आणि डेटा डिजिटायझेशनचा (संगणकीकरणाचा) वेग वाढवण्याच्या स्पष्ट सूचना कर्मचाऱ्यांना दिल्या. ही मोहीम लोकशाहीच्या बळकटीकरणासाठी अत्यंत महत्त्वाची असून, मतदारसंघातील सर्व पात्र नागरिकांनी, विशेषतः तरुण मतदारांनी या विशेष मोहिमेचा लाभ घ्यावा आणि आपले नाव मतदार यादीत नोंदवावे, असे आवाहन डॉ. खल्लाळ यांनी केले आहे.
– माधव वाघमारे, प्रतिनिधी
