नांदेड ८ जुलै (प्रतिनिधी) माधव वाघमारे
मतदार यादी अधिक अचूक, अद्ययावत आणि सर्वसमावेशक करण्यासाठी जिल्हा प्रशासनातर्फे राबविण्यात येत असलेली विशेष सखोल पुनरिक्षण (SIR) मोहीम अत्यंत महत्त्वाची आहे. या मोहिमेअंतर्गत गणना पत्रके भरण्यासाठी गृहभेटी देणाऱ्या बूथस्तरीय अधिकाऱ्यांना (BLO) नागरिकांनी संपूर्ण सहकार्य करून अचूक माहिती द्यावी, असे आवाहन जिल्हा परिषदेचे मुख्य कार्यकारी अधिकारी तथा प्रशासक महेश पाटील यांनी केले आहे.
लोहा तालुक्यातील धानोरा आणि पिंपळगाव ढगे या गावांना आज मुख्य कार्यकारी अधिकाऱ्यांनी प्रत्यक्ष भेट देऊन सुरू असलेल्या कामाची पाहणी केली, त्याप्रसंगी ते ग्रामस्थांशी संवाद साधत होते.
युवकांनी स्वयंसेवक म्हणून पुढाकार घ्यावा
भेटीदरम्यान मुख्य कार्यकारी अधिकारी महेश पाटील यांनी बूथस्तरीय अधिकाऱ्यांकडून सुरू असलेल्या गृहभेटींच्या कामाचा सविस्तर आढावा घेतला आणि संबंधित कर्मचाऱ्यांना आवश्यक त्या सूचना दिल्या. गावातील तरुण वर्गाने या राष्ट्रीय कामात पुढे येण्याची गरज अधोरेखित करताना ते म्हणाले की, ज्या गावांमध्ये एकाच समाजाची किंवा समान आडनावांची कुटुंबे मोठ्या संख्येने राहतात, तिथे अचूकतेसाठी २० ते २५ स्थानिक युवकांचे स्वयंसेवक गट तयार केले जावेत. या युवकांना आवश्यक ते प्रशिक्षण देऊन त्यांच्यामार्फत गृहभेटी, मोहिमेची जनजागृती, गणना पत्रके विहित मुदतीत गोळा करणे आणि त्यांची ऑनलाइन नोंदणी वेळेत पूर्ण करून घेणे या कामांना गती द्यावी.
प्रधानमंत्री आवास योजनेची पाहणी
या दौऱ्यादरम्यान मुख्य कार्यकारी अधिकाऱ्यांनी केवळ मतदार यादी पुनरीक्षणाचाच नव्हे, तर ग्रामीण भागातील विकासकामांचाही आढावा घेतला. त्यांनी प्रधानमंत्री आवास योजना (ग्रामीण) अंतर्गत सुरू असलेल्या घरकुल बांधकामांना प्रत्यक्ष भेट दिली. घरकुल लाभार्थ्यांशी संवाद साधून त्यांनी कामाच्या प्रगतीची माहिती घेतली आणि घरकुलांची कामे दर्जेदार व वेळेत पूर्ण करण्याबाबत संबंधित यंत्रणेला निर्देशित केले.
या महत्त्वपूर्ण दौऱ्याप्रसंगी जिल्हा परिषदेचे अतिरिक्त मुख्य कार्यकारी अधिकारी संदीप माळोदे, लोहाचे गट विकास अधिकारी कुलकर्णी, नायब तहसीलदार संदीप हडगे यांच्यासह संबंधित विविध विभागांचे अधिकारी, विस्तार अधिकारी आणि ग्रामस्थ मोठ्या संख्येने उपस्थित होते.
