नांदेड ०७ जून (प्रतिनिधी माधव वाघमारे)
नांदेडचे पोलीस अधीक्षक अविनाश कुमार यांच्या मार्गदर्शनाखाली जिल्ह्यामध्ये ‘ऑपरेशन फ्लश आऊट’ अंतर्गत गुन्ह्यांतील पाहिजे असलेल्या व फरार आरोपींचा शोध घेण्यासाठी विशेष मोहीम राबवली जात आहे. या मोहिमेला नांदेड स्थानिक गुन्हे शाखेला (LCB) मोठे यश आले असून, जबर दुखापत करून गंभीर जखमी करणाऱ्या आणि गेल्या दोन महिन्यांपासून फरार असलेल्या एका पाहिजे असलेल्या अट्टल आरोपीच्या मुसक्या आवळण्यात आल्या आहेत.
गुप्त बातमीदाराच्या माहितीवरून पडली धाड
नांदेड ग्रामीण पोलीस ठाण्याच्या हद्दीत गु.र.नं. ३१३/२०२६ नुसार भारतीय न्याय संहिता आणि शस्त्र अधिनियमान्वये दाखल असलेल्या एका गंभीर गुन्ह्यातील आरोपी दोन महिन्यांपासून पोलिसांना गुंगारा देत होता. दिनांक ७ जून २०२६ रोजी स्थानिक गुन्हे शाखेचे पोलीस उपनिरीक्षक महेश कोरे व त्यांचे पथक नांदेड ग्रामीण पोलीस स्टेशनच्या हद्दीत पेट्रोलींग करत होते.
या दरम्यान पथकाला गुप्त बातमीदाराकडून विश्वासार्ह माहिती मिळाली की, संबंधित गुन्ह्यातील पाहिजे असलेला आरोपी वाजेगाव येथील जामवाडी रोडवर थांबलेला आहे. माहिती मिळताच पथकाने तात्काळ कारवाई करत जामवाडी रोड, वाजेगाव येथे सापळा रचून आरोपीला ताब्यात घेतले.
आरोपीने दिली गुन्ह्याची कबुली
पकडण्यात आलेल्या आरोपीचे नाव शेख महेबुब उर्फ गोरो पि. शेख बाबु (वय २९ वर्षे, रा. ग्रामपंचायत कार्यालयाच्या पाठीमागे, वाजेगाव, ता. जि. नांदेड) असे आहे. पोलिसांनी त्याला विश्वासात घेऊन सखोल चौकशी केली असता, त्याने त्याचा साथीदार शेख सोहेल उर्फ छोटा गुजर (रा. वाजेगाव) याच्यासह संगनमत करून फिर्यादीच्या मुलास खंजराने मारून गंभीर जखमी केल्याची कबुली दिली.
आरोपीविरुद्ध यापूर्वीही शरीराविरुद्धचे व अग्निशस्त्राशी संबंधित गंभीर गुन्हे दाखल आहेत. गुन्ह्याचा पुढील तपास करण्यासाठी स्थानिक गुन्हे शाखेने आरोपीला नांदेड ग्रामीण पोलिसांच्या ताब्यात दिले आहे.
या पथकाने केली कारवाई
ही धडक कारवाई पोलीस अधीक्षक अबिनाश कुमार, अपर पोलीस अधीक्षक (भोकर) श्रीमती अर्चना पाटील आणि अपर पोलीस अधीक्षक (नांदेड) सुरज गुरव यांच्या मार्गदर्शनाखाली करण्यात आली.
कारवाईत स्थानिक गुन्हे शाखेचे पोलीस निरीक्षक अतुल भोसले, पोलीस उपनिरीक्षक महेश कोरे, तसेच पोलीस अंमलदार माधव माने, श्रीराम दासरे, मनोज राठोड आणि चापोका/सुधाकर देवकते यांनी महत्त्वाची भूमिका बजावली. या उत्कृष्ट कामगिरीबद्दल पोलीस अधीक्षकांनी संपूर्ण पथकाचे कौतुक करून अभिनंदन केले आहे.
