नांदेड, दि. १२ जानेवारी (प्रतिनिधी) माधव वाघमारे नांदेड वाघाळा शहर महानगरपालिका निवडणुकीच्या पार्श्वभूमीवर आचारसंहिता कालावधीत गैरप्रकारांना आळा घालण्यासाठी प्रशासनाने कडक पावले उचलली असून, आचारसंहिता पथकांनी राज्य उत्पादन शुल्क विभागाच्या सहकार्याने अवैध देशी-विदेशी मद्यविक्रीविरोधात जोरदार कारवाई केली आहे. या कारवाईत तब्बल ४४१.२४ लिटर अवैध मद्य तसेच २.२ किलो गांजा जप्त करण्यात आला आहे.
राज्य उत्पादन शुल्क विभाग, नांदेड यांनी १५ डिसेंबर २०२५ ते ११ जानेवारी २०२६ या कालावधीत नांदेड शहर व जिल्ह्यात अवैध मद्य विक्री व वाहतुकीविरोधात धडक मोहिम राबवून एकूण ०५ गुन्हे नोंद केले आहेत. निवडणूक काळात मतदारांवर प्रभाव टाकण्यासाठी होणाऱ्या बेकायदेशीर प्रकारांना प्रतिबंध करण्यासाठी ही कारवाई महत्त्वाची ठरली आहे.
त्याचप्रमाणे पोलीस विभागामार्फत अवैध शस्त्रास्त्रांविरोधात करण्यात आलेल्या कारवाईत ०१ पिस्तूल, ०१ राऊंड, ०४ खंजर व ०७ तलवारी जप्त करण्यात आल्या आहेत. तसेच प्रतिबंधात्मक उपाययोजनांतर्गत विविध कलमांखाली ९२९ व्यक्तींवर हद्दपार व तत्सम कारवाई करण्यात आली आहे.
महापालिका निवडणूक विभागाने निवडणूक प्रक्रिया पारदर्शक व भयमुक्त पार पाडण्यासाठी ७ फिरते भरारी पथके, १५ स्थिर सर्व्हेक्षण पथके, ७ व्हिडीओ सर्व्हिलियन्स पथके व २ आचारसंहिता दक्षता पथके कार्यरत ठेवली आहेत. या पथकांच्या माध्यमातून संपूर्ण शहरावर काटेकोर लक्ष ठेवले जात असून, विविध ठिकाणी नाकाबंदी करून वाहनांची तपासणीही नियमितपणे सुरू आहे. राज्य निवडणूक आयोगाच्या आदेशानुसार फिरती भरारी पथके २४ तास कार्यरत राहून आचारसंहितेची प्रभावी अंमलबजावणी करत आहेत.
आचारसंहिता भंग करणाऱ्यांवर कठोर कारवाईचा इशारा
महानगरपालिका निवडणुकीत उमेदवारांची संख्या मोठी असून निवडणूक काळात आचारसंहितेचा भंग करणाऱ्यांवर कोणतीही तडजोड न करता कठोर कारवाई केली जाईल, असा स्पष्ट इशारा पालिका आयुक्त तथा निवडणूक अधिकारी डॉ. महेशकुमार डोइफोडे यांनी दिला आहे.
