मुखेड / ७ ऑगस्ट (प्रतिनिधी माधव वाघमारे)
नांदेड जिल्ह्यात अवैध धंद्यांविरोधात पोलिसांनी विशेष मोहीम उघडली असून, विनापरवाना अवैध वाळू वाहतूक करणाऱ्या हायवा टिप्परवर मुखेड पोलीस पथकाने धडक कारवाई केली आहे. या कारवाईत पोलिसांनी अंदाजे ४० लाख रुपयांचा हायवा आणि २५ हजार रुपये किमतीची ५ ब्रास वाळू, असा एकूण ४० लाख २५ हजार रुपयांचा मुद्देमाल जप्त केला आहे.
मिळालेल्या माहितीनुसार, ७ ऑगस्ट २०२६ रोजी नरसी ते मुखेड जाणाऱ्या रोडवर एका हायवा टिप्पर (क्र. MH-04-JU-0486) मधून अवैध वाळूची (रेती) वाहतूक केली जात असल्याची बातमी मुखेड पोलिसांना गुप्त माहितीदाराकडून मिळाली. माहिती मिळताच पोलीस पथकाने नरसी-मुखेड मार्गावर सापळा रचून सदर हायवा अडवला आणि त्याची कसून पाहणी केली.
तपासादरम्यान हायवा चालक उद्धव रामचंद्र भरकडे (वय ३० वर्षे, रा. कौडगाव, ता. लोहा) याच्याकडे वाळू वाहतुकीसाठी आवश्यक असणारी रॉयल्टी किंवा कोणताही वैध परवाना आढळून आला नाही. वाहनात अंदाजे ५ ब्रास वाळू भरलेली होती. अधिक चौकशी केली असता सदर हायवा वाहनाचा मालक कृष्णाजी दशरथ भरकडे (रा. कौडगाव, ता. लोहा, जि. नांदेड) असल्याचे निष्पन्न झाले.
याप्रकरणी चालक उद्धव भरकडे व मालक कृष्णाजी भरकडे या दोघांविरोधात पोलीस ठाणे मुखेड येथे गु.र.नं. २४५/२०२६ कलम ३०३(२) BNS सह कलम ४८(७), ४८(८) जमीन महसूल अधिनियमान्वये गुन्हा दाखल करण्यात आला असून पुढील तपास मुखेड पोलीस करत आहेत.
सदर कारवाई पोलीस अधीक्षक मा. डॉ. निलाभ रोहन यांच्या आदेशाने, देगलूरचे पोलीस उपअधीक्षक किरण पोपळघट यांच्या मार्गदर्शनाखाली पोनि. चिंतांबर कामठेवाड, पोउपनि. संदीप यामावार तसेच पोलीस अंमलदार यादव इबितवार, धम्मा सोनकांबळे, रविंद्र भुले व सुरज गाजलवाड यांनी यशस्वीरीत्या पार पाडली.
