प्रतिनिधी : माधव वाघमारे
नांदेड ३१ जुलै
नांदेड जिल्ह्यात अवैध धंद्यांविरुद्ध पोलीस अधीक्षक मा. डॉ. नीलाभ रोहन यांनी पुकारलेल्या विशेष मोहिमेअंतर्गत नांदेड ग्रामीण पोलिसांनी वाळू माफियांच्या मुसक्या आवळत आतापर्यंतची सर्वात मोठी कारवाई केली आहे. नांदेड ग्रामीण पोलीस ठाण्याच्या हद्दीतील आसर्जन ते मार्कंड शिवारातील गोदावरी नदीपात्रात सुरू असलेल्या अवैध रेती उत्खननावर धडक कारवाई करत तब्बल ₹३,६४,४५,८००/- (३ कोटी ६४ लाख ४५ हजार ८०० रुपये) किमतीचा मुद्देमाल जप्त केला आहे. या धडक कारवाईमुळे जिल्ह्यातील अवैध वाळू माफियांमध्ये प्रचंड खळबळ उडाली आहे.

अशी झाली धडक कारवाई:

दिनांक ३० जुलै २०२६ रोजी नांदेड ग्रामीण पोलीस ठाण्याचे प्रभारी अधिकारी पोलीस निरीक्षक ओमकांत चिंचोलकर हे आपल्या विशेष पथकासह अवैध धंदे व अवैध गौण खनिज उत्खननाविरोधात परिसरात गस्त घालत असताना, त्यांना गोपनीय बातमीदाराकडून पक्की माहिती मिळाली. आसर्जन ते मार्कंड शिवारातील गोदावरी नदीपात्रात काही इसम बोटी, तराफे आणि इंजिनांच्या सहाय्याने मोठ्या प्रमाणात बेकायदेशीरपणे वाळूचा उपसा करत असल्याचे समजले.
माहिती मिळताच पोलीस पथकाने पंचांसमक्ष घटनास्थळी छापा टाकला. पोलिसांची चाहूल लागताच नदीपात्रातील वाळू माफिया आणि कामगार पसार झाले. मात्र, पोलिसांनी घटनास्थळाची पाहणी केली असता तेथे अद्ययावत यंत्रसामग्री व रेती उत्खननाचे प्रचंड साहित्य आढळून आले.

जप्त व नष्ट करण्यात आलेला ३.६४ कोटींचा मुद्देमाल:

घटनास्थळावरून पोलिसांनी खालील मुद्देमाल जप्त करून जागेवरच नष्ट व जप्त करण्याची कारवाई केली:
१) पाण्यात तरंगणारे २११ तराफे – अंदाजे ₹१,०५,५०,०००/-
२) १५ इंजिने – अंदाजे ₹४५,००,०००/-
३) १० मोठ्या लोखंडी बोटी – अंदाजे ₹१,५०,००,०००/-
४) ५ लहान लोखंडी बोटी – अंदाजे ₹५०,००,०००/-
५) तराफ्यांवरील १६० ब्रास रेती – अंदाजे ₹८,००,०००/-
६) नदीकाठावरील १०० ब्रास रेती – अंदाजे ₹५,००,०००/-
७) इतर साहित्य: २५ मोठे टोपले (₹५,०००/-), २० खोरे (₹६,०००/-), २० लोखंडी ड्रम (₹२०,०००/-), ८ प्लास्टिक ड्रम (₹४,८००/-) आणि २० लोखंडी पाईप (₹६०,०००/-).
एकूण जप्त मुद्देमाल : ₹३,६४,४५,८००/-

६ जणांवर गंभीर कलमांन्वये गुन्हे दाखल:

शासनाची कोणतीही वैद्य परवानगी नसताना गोदावरी नदीपात्रातून बेकायदेशीरपणे रेतीचे उत्खनन करून शासनाच्या महसुलाचे मोठे नुकसान केल्याप्रकरणी खालील आरोपींवर गुन्हे दाखल करण्यात आले आहेत:
१. नारायण बाबुराव पुंड (रा. पिंपळगाव, नांदेड)
२. विठ्ठल दशरथ डक (रा. पिंपळगाव, नांदेड)
३. गोविंद बालाजी डक (रा. पिंपळगाव, नांदेड)
४. सचिन श्रीसागर (रा. कल्लाळ, नांदेड)
५. गंगाधर मेथेवाड
६. चंद्रकांत कामाजी लाकडे (रा. मार्कंड, नांदेड)
तसेच इतर ५ ते ६ अनोळखी इसम.
सदर आरोपींविरुद्ध नांदेड ग्रामीण पोलीस ठाण्यात गुन्हा रजि. नंबर ९२८/२०२६ अन्वये भारतीय न्याय संहिता (BNS) कलम ३०३(२), ३(५), महाराष्ट्र जमीन महसूल संहिता कलम ४८ (७) (८), पर्यावरण संरक्षण अधिनियम कलम ९ व १५, तसेच सार्वजनिक संपत्ती नुकसान प्रतिबंधक अधिनियम कलम ३ व ७ प्रमाणे गुन्हा दाखल करण्यात आला असून पुढील तपास सुरू आहे.

वाळू माफियांना पोलीस अधीक्षकांचा इशारा:

या कारवाईमुळे शासनाचा महसूल बुडवणाऱ्या आणि पर्यावरणाचा ऱ्हास करणाऱ्या अवैध रेती माफियांना मोठा चाप बसला आहे. अशा प्रकारच्या कोणत्याही बेकायदेशीर आणि अवैध कृत्यांविरुद्ध नांदेड पोलीस यापुढेही कठोर व दंडात्मक कारवाई करतील, असा सज्जड इशारा पोलीस प्रशासनाने दिला आहे.

कारवाई करणारे पथक:

ही उल्लेखनीय व यशस्वी कारवाई नांदेड जिल्ह्याचे पोलीस अधीक्षक मा. डॉ. नीलाभ रोहन यांच्या मार्गदर्शनाखाली:

• पोलीस निरीक्षक: ओमकांत चिंचोलकर
• पोलीस उपनिरीक्षक: व्यंकट कुसमे
• पोलीस उपनिरीक्षक: बापुराव चव्हाण
• पोलीस अंमलदार: सपोउपनि/ भोसले, जेंकुटे, जमीर, सिरमलवार, जाधव, गफार, कल्याणकर, आणि शेख फय्याज (सर्व नेमणूक नांदेड ग्रामीण पोलीस ठाणे) यांनी पार पाडली.

पोलीस प्रशासनाचे आवाहन:
नांदेड जिल्हा पोलीस दलातर्फे नागरिकांना आवाहन करण्यात येते की, कुठेही अवैध रेती उत्खनन, वाहतूक अथवा साठा आढळल्यास तात्काळ जवळच्या पोलीस ठाण्यात किंवा पोलीस नियंत्रण कक्षाशी संपर्क साधावा. बातमीदाराचे नाव गुप्त ठेवले जाईल.