नांदेड २५ एप्रिल प्रतिनिधी
नांदेड शहरात सुरक्षितता राखण्यासाठी आणि गुन्हेगारीला लगाम घालण्यासाठी पोलीस अधीक्षक अभिनश कुमार यांच्या मार्गदर्शनाखाली ‘स्ट्रीट सेफ्टी ड्राईव्ह’ राबवली जात आहे. या मोहिमेअंतर्गत स्ट्रीट सेफ्टी पथकाने विमानतळ पोलीस ठाण्याच्या हद्दीत धडक कारवाई करत, अवैध शस्त्र बाळगणाऱ्या आणि संशयास्पदरीत्या वावरणाऱ्या तीन तरुणांना ताब्यात घेतले आहे. त्यांच्याकडून एक लोखंडी खंजर जप्त करण्यात आला आहे.
नेमकी घटना काय?
दिनांक २४ एप्रिल २०२६ रोजी स्ट्रीट सेफ्टी पथकाचे अधिकारी आणि अंमलदार शहरात कोम्बिंग ऑपरेशन व गस्त घालत होते. यावेळी माळटेकडी ब्रिज परिसरात एक इसम अवैध शस्त्र घेऊन फिरत असल्याची खात्रीलायक माहिती पथकाला मिळाली. पोलिसांनी तत्काळ सापळा रचून सुनीलसिंग दर्शनसिंग दुधानी (वय २६, रा. अहमदपूर, जि. लातूर) याला ताब्यात घेतले. त्याची अंगझडती घेतली असता त्याच्याकडे १००० रुपये किमतीचा एक लोखंडी खंजर मिळून आला.
अंधारात दबा धरून बसलेले दोघे ताब्यात
याच गस्ती दरम्यान माळटेकडी परिसरात दोन व्यक्ती अंधारात स्वतःचे अस्तित्व लपवून, संशयास्पदरीत्या दबा धरून बसल्याचे पोलिसांच्या निदर्शनास आले. पोलिसांनी त्यांना ताब्यात घेऊन विचारपूस केली असता, त्यांनी आपली नावे अर्जुनसिंग धारासिंग दुधानी (वय ३१) आणि किरपालसिंग गुरुबच्चनसिंग दुधानी (वय २६, दोन्ही रा. साखला प्लॉट, परभणी) अशी सांगितली. कोणताही अनुचित प्रकार घडण्यापूर्वीच पोलिसांनी या संशयितांना ताब्यात घेतले.
गुन्हा दाखल व पोलीस पथक
याप्रकरणी विमानतळ पोलीस ठाण्यात भारतीय हत्यार कायदा कलम ४/२५ आणि मपोका कलम १२२ अन्वये दोन स्वतंत्र गुन्हे (गु.र.नं. १७५/२०२६ आणि १७६/२०२६) दाखल करण्यात आले आहेत.
ही यशस्वी कारवाई पोलीस अधीक्षक कु अबिनाश कुमार, अप्पर पोलीस अधीक्षक अर्चना पाटील (भोकर), आणि अप्पर पोलीस अधीक्षक सुरज गुरव (नांदेड) यांच्या मार्गदर्शनाखाली, स्ट्रीट सेफ्टी पथक प्रमुख सपोनि भागवत नागरगोजे, पोउपनि खंडू दर्शने, नितीन वाघमारे, प्रशिक्षक हाटकर, कपिल सूर्यवंशी, हरिसिंग राठोड आणि विमानतळ पोलीस ठाण्याच्या कर्मचाऱ्यांनी केली आहे.
पोलीस अधीक्षकांनी या कामगिरीबद्दल संबंधित पथकाचे विशेष कौतुक आणि अभिनंदन केले आहे.
बातमी: प्रतिनिधी माधव वाघमारे
