नांदेड १५ एप्रिल प्रतिनिधी

नांदेड जिल्ह्यामध्ये अवैध अग्निशस्त्रांविरुद्ध पोलिसांनी कडक मोहीम उघडली आहे. याच मोहिमेअंतर्गत स्थानिक गुन्हे शाखेने (LCB) इतवारा परिसरात छापा टाकून एका तरुणाला ताब्यात घेतले असून, त्याच्याकडून एक गावठी पिस्तुल आणि जिवंत काडतूस जप्त केले आहे.

नेमकी घटना काय?

नांदेडचे पोलीस अधीक्षक अविनाश कुमार यांनी जिल्ह्यात अवैध शस्त्रे बाळगणाऱ्यांवर कारवाई करण्यासाठी ‘ऑपरेशन फ्लॅश आऊट’ सुरू केले आहे. या मोहिमेअंतर्गत स्थानिक गुन्हे शाखेचे पोलीस निरीक्षक उदय खंडेराय यांच्या मार्गदर्शनाखाली पथक गस्त घालत होते. १५ एप्रिल रोजी सहाय्यक पोलीस निरीक्षक रवि वाहुळे यांना गोपनीय माहिती मिळाली की, इतवारा भागातील संघसेन नगर येथे एक तरुण बेकायदेशीररीत्या पिस्तुल विक्रीसाठी घेऊन थांबला आहे.
माहिती मिळताच पोलिसांनी संघसेन नगर परिसरात सापळा रचला. यावेळी संशयास्पदरीत्या आढळलेल्या एका तरुणाची झडती घेतली असता, त्याच्याकडे एक लोखंडी गावठी पिस्तुल आणि एक जिवंत काडतूस मिळून आले. पोलिसांनी तात्काळ हा मुद्देमाल जप्त करून आरोपीला ताब्यात घेतले.

आरोपीची ओळख

पकडण्यात आलेल्या आरोपीचे नाव प्रितम उर्फ बबलूलाल आनंद लोखंडे (वय २२ वर्ष, रा. संघसेन नगर, इतवारा, नांदेड) असे आहे. जप्त करण्यात आलेल्या शस्त्रसाठ्याची किंमत सुमारे ३१,००० रुपये असल्याचे पोलिसांनी सांगितले.

पोलीस पथकाची कामगिरी

ही यशस्वी कारवाई पोलीस अधीक्षक अविनाश कुमार, अपर पोलीस अधीक्षक अर्चना पाटील (भोकर), आणि अपर पोलीस अधीक्षक सुरज गुरव यांच्या मार्गदर्शनाखाली करण्यात आली.
या पथकात पोलीस निरीक्षक उदय खंडेराय, सपोनि रवि वाहुळे, पोलीस उपनिरीक्षक बळीराम दासरे, माधव केंद्रे, गुंडेराव करले तसेच अंमलदार दिलीपकुमार चंचलवार, मिलींद नरबाग, मोतीराम पवार, मारोती मोरे आणि सिद्धार्थ सोनसळे यांचा समावेश होता. या धडाकेबाज कारवाईबद्दल पोलीस अधीक्षकांनी पथकाचे कौतुक केले आहे.
पुढील तपासासाठी आरोपीला मुद्देमालासह इतवारा पोलीस ठाण्याच्या ताब्यात देण्यात आले असून, त्याच्यावर भारतीय हत्यार कायद्यान्वये गुन्हा दाखल करण्यात आला आहे.
वृत्त संकलन
प्रतिनिधी माधव वाघमारे, नांदेड.