नांदेड १६ एप्रिल प्रतिनिधी
जिल्ह्यात हवामानाचा लहरीपणा पुन्हा एकदा अनुभवायला मिळणार आहे. प्रादेशिक हवामान केंद्र, मुंबई यांच्या सूचनेनुसार नांदेड जिल्ह्यासाठी १७ एप्रिल ते २० एप्रिल २०२६ या चार दिवसांसाठी ‘येलो अलर्ट’ (Yellow Alert) जारी करण्यात आला आहे. या काळात जिल्ह्याच्या काही भागात उष्णतेची लाट राहण्याची शक्यता असून, दुपारनंतर वादळी वाऱ्यासह पावसाचाही अंदाज वर्तवण्यात आला आहे.
असा असेल हवामानाचा अंदाज:
- १७ एप्रिल: जिल्हयात तुरळक ठिकाणी उष्णतेची लाट राहण्याची दाट शक्यता.
- १८ एप्रिल: तीव्र उष्णतेसोबतच दुपारनंतर किंवा संध्याकाळी विजांच्या कडकडाटासह हलका ते मध्यम पाऊस पडू शकतो.
- १९ व २० एप्रिल: ताशी ३० ते ४० किमी वेगाने वादळी वारे वाहतील आणि विजांच्या कडकडाटासह पाऊस होण्याची शक्यता आहे.
निवासी उपजिल्हाधिकारी किरण आंबेकर यांनी या नैसर्गिक आपत्तीच्या पार्श्वभूमीवर सर्व यंत्रणांना सतर्क राहण्याचे आदेश दिले असून नागरिकांनी स्वतःची काळजी घेण्याचे आवाहन केले आहे.
नागरिकांसाठी महत्त्वाची नियमावली (काय करावे/काय टाळावे):
काय करावे:
- तहान नसली तरी पुरेसे पाणी प्या.
- शरीरातील पाण्याचे प्रमाण वाढवण्यासाठी ओआरएस (ORS), घरगुती लस्सी, ताक, लिंबूपाणी आणि नारळपाणी यांचा वापर करा.
- हलक्या रंगाचे आणि सैलसर सुती कपडे वापरा.
- बाहेर जाताना डोके झाकून ठेवा; टोपी, छत्री किंवा ओले कापड सोबत ठेवा.
- लहान मुले, ज्येष्ठ नागरिक आणि आजारी व्यक्तींची विशेष काळजी घ्या.
काय टाळावे: - दुपारी १२ ते ३ या वेळेत उन्हात जाणे आणि कष्टाची कामे करणे टाळा.
- अनवाणी पायाने बाहेर फिरू नका.
- अल्कोहोल, चहा, कॉफी आणि शितपेये टाळा, कारण यामुळे शरीरातील पाणी कमी होते.
- जास्त प्रथिने असलेले, तिखट किंवा तेलकट आणि शिळे अन्न खाऊ नका.
- पार्किंग केलेल्या वाहनात लहान मुले किंवा पाळीव प्राण्यांना सोडू नका.
(प्रतिनिधी) माधव वाघमारे
