नांदेड १५ एप्रिल (प्रतिनिधी माधव वाघमारे)
धर्माबाद तालुक्यातील मौजे माळी आणि मनूर येथील बौद्ध समाजाच्या अनेक वर्षांपासून प्रलंबित असलेल्या न्याय्य मागण्यांकडे स्थानिक प्रशासनाने सातत्याने दुर्लक्ष केल्याने, आता भीम आर्मी भारत एकता मिशनच्या वतीने आक्रमक पवित्रा घेण्यात आला आहे. या प्रलंबित मागण्यांसाठी येत्या १० एप्रिल २०२६ पासून धर्माबाद पंचायत समितीसमोर बेमुदत धरणे आंदोलन आणि त्यानंतर मुंबई मंत्रालयावर ‘पायी लॉंग मार्च’ काढण्याचा इशारा निवेदनाद्वारे देण्यात आला आहे.

काय आहेत मुख्य मागण्या?

भीम आर्मीने प्रशासनाला सादर केलेल्या निवेदनात प्रामुख्याने खालील मागण्यांचा समावेश आहे:

• स्मशानभूमी व बुद्ध विहार जागा: मौजे माळी (ता. धर्माबाद) येथील बौद्ध स्मशानभूमीला नमुना क्रमांक ८ अ लावून अधिकृत करून देण्यात यावे. तसेच बुद्ध मंदिर व विहाराच्या जागेचे अधिकृत कागदपत्रे देऊन ती जागा सुनिश्चित करावी.
• पिण्याच्या पाण्याची सोय: दलित वस्तीमध्ये स्वच्छ (RO Water) फिल्टर पाण्याची तात्काळ सोय करावी आणि सांडपाण्याची योग्य व्यवस्था (गटार लाईन) करण्यात यावी.
• मनूर येथील जमिनीचा प्रश्न: मौजे मनूर येथील बौद्ध समाजाला १९८३ च्या पुनर्वसनावेळी इतर धर्मीयांप्रमाणे अधिकृत जागा मिळाली होती, परंतु जातीय द्वेषातून ती अद्यापही देण्यात आलेली नाही. ती जागा आणि डॉ. बाबासाहेब आंबेडकर यांच्या जयंतीसाठी अधिकृत जागा तात्काळ उपलब्ध करून द्यावी.
• ग्रामसेवकावर कारवाईची मागणी: मनूर येथील जागे संदर्भात कोणत्याही मासिक व ग्रामसभेत ठराव न घेता, बनावट ठराव करून दिशाभूल करणाऱ्या संबंधित प्रशासकीय अधिकारी (ग्रामसेवक) आणि ग्रामपंचायत सदस्यांवर ॲट्रॉसिटी कायद्यांतर्गत गुन्हा दाखल करण्याची मागणी करण्यात आली आहे.
• भ्रष्टाचाराची चौकशी: माळी व मनूर या दोन्ही गावांच्या ग्रामपंचायतीच्या मागील ५ वर्षांच्या विकास कामांची सखोल चौकशी करून दोषी आढळणाऱ्या कर्मचाऱ्यांवर कायदेशीर कारवाई करण्याची मागणी करण्यात आली आहे.

आंदोलनाची दिशा आणि मार्ग

३० मार्च २०२६ पासून भीम आर्मीने या प्रश्नावर पाठपुरावा सुरू केला आहे. मात्र, प्रशासनाकडून ठोस प्रतिसाद न मिळाल्याने १० एप्रिलपासून आंदोलनाचे हत्यार उपसले जाणार आहे. हा पायी मोर्चा धर्माबाद येथून निघून उमरी, मुदखेड, नांदेड, संभाजीनगर, नाशिक, कसारा घाट, भिवंडी मार्गे मुंबई मंत्रालयावर धडकणार आहे.
या आंदोलनाचे नेतृत्व भीम आर्मीचे जिल्हाध्यक्ष स्वप्नील चंद्रकांत भोसीकर आणि धर्माबाद तालुकाध्यक्ष कुलदिप मारोती मस्के करत आहेत. आंदोलनादरम्यान कोणताही अनुचित प्रकार घडू नये यासाठी प्रशासनाने योग्य पोलीस बंदोबस्त, रुग्णवाहिका आणि वैद्यकीय सुविधा पुरवाव्यात, अशी विनंतीही निवेदनात करण्यात आली आहे.
जोपर्यंत मागण्या मान्य होत नाहीत, तोपर्यंत माघार घेणार नसल्याचा निर्धार भीम आर्मीने व्यक्त केल्यामुळे आता प्रशासनाच्या भूमिकेकडे सर्वांचे लक्ष लागले आहे.