‘
प्रतिनिधी, माधव वाघमारे
नांदेड १९ मे देशभरात खळबळ उडवून देणाऱ्या ‘नीट’ (NEET) वैद्यकीय प्रवेश परीक्षा पेपरफुटी प्रकरणात केंद्रीय अन्वेषण विभागाने (CBI) मोठी कारवाई केली आहे. या प्रकरणातील मुख्य संशयित आणि लातूर येथील नामांकित ‘आरसीसी’ (रेणुकाई कोचिंग सेंटर) चे संचालक प्रा. शिवराज मोटेगावकर यांना सीबीआयने अटक केली आहे. त्यांना विशेष सीबीआय न्यायालयासमोर हजर केले असता, न्यायालयाने त्यांना ९ दिवसांची सीबीआय कोठडी सुनावली आहे.
यापूर्वी या प्रकरणात प्रा. पी. व्ही. कुलकर्णी आणि प्रा. मनीषा मांढरे यांना अटक करण्यात आली असून, आता मोटेगावकर यांच्या अटकेमुळे या रॅकेटचे धागेदोरे आणखी गडद झाले आहेत.
स्वतःच्या मुलासाठी फोडला पेपर?
सीबीआयने गेल्या दोन दिवसांत केलेल्या कसून चौकशीत मोटेगावकर यांच्याविरोधात अत्यंत भक्कम पुरावे हाती आले आहेत. मोटेगावकर यांनी चक्क स्वतःच्या मुलासाठीच नीटचा पेपर फोडल्याचा दाट संशय सीबीआयला आहे. सीबीआयने लातूर येथील शिवराज मोटेगावकर यांच्या घरावर टाकलेल्या छाप्यात मोठे यश आले असून, घरझडतीदरम्यान त्यांच्या घरातून चक्क ‘केमिस्ट्री’ (रसायनशास्त्र) या विषयाची नीट परीक्षेची मूळ प्रश्नपत्रिका हस्तगत करण्यात आली आहे.
परीक्षा सुरू होण्यापूर्वी १० दिवस आधीच पेपर लीक
तपासातून समोर आलेल्या धक्कादायक माहितीनुसार, ५ मे रोजी देशभरात नीटची परीक्षा होणार होती. मात्र, परीक्षेच्या तब्बल १० दिवस आधीच म्हणजेच २३ एप्रिल रोजीच शिवराज मोटेगावकर याने नीटची प्रश्नपत्रिका मिळवली होती.
न्यायाधीशांचे थेट प्रश्न आणि सीबीआयचा खुलासा
सुनावणीदरम्यान सीबीआय कोर्टात न्यायाधीश आणि तपास अधिकारी यांच्यात झालेला संवाद अत्यंत महत्त्वाचा ठरला.
न्यायाधीश: “मोटेगावकरकडेच प्रश्नपत्रिका आहेत, हे तुम्हाला कसे कळाले?”
तपास अधिकारी पवन कौशिक: “या प्रकरणातील संशयित निवृत्त प्राध्यापक पी. व्ही. कुलकर्णी हा शिवराज मोटेगावकरच्या सतत संपर्कात होता. त्यांच्यातील कॉल रेकॉर्ड्स आणि संवादाद्वारेच ही बाब समोर आली आहे.”प्रा. पी. व्ही. कुलकर्णी आणि मोटेगावकर यांचे कनेक्शन
नीट पेपरफुटी प्रकरणी पुण्यातून अटक करण्यात आलेला निवृत्त प्राध्यापक पी. व्ही. कुलकर्णी हा मूळचा प्रश्नपत्रिका सेटर (Paper Setter) होता. तो लातूरमधील एका नामांकित कॉलेजमधून निवृत्त झाला होता. विशेष म्हणजे, त्याने काही काळ शिवराज मोटेगावकरच्या ‘आरसीसी’ कोचिंग क्लासमध्ये अध्यापनही केले होते. मध्ये काही काळ त्यांच्यात मतभेद झाले होते, मात्र नंतर पुन्हा त्यांचे सूत जुळले. हे दोघेही या पेपरफुटीचे मुख्य सूत्रधार असल्याचे समोर येत आहे.
प्रा. मनीषा मांढरेला १४ दिवसांची कोठडी
याच प्रकरणातील दुसरी संशयित आरोपी प्रा. मनीषा मांढरे हिला १४ दिवसांची कोठडी सुनावण्यात आली आहे. पुण्यातील बायोलॉजी लेक्चरर असलेल्या मनीषा मांढरे हिची दिल्लीतील सीबीआय मुख्यालयात चौकशी केल्यानंतर तिला अटक करण्यात आली होती. तपास यंत्रणेच्या दाव्यानुसार, मांढरे ही ‘एनटीए’च्या (NTA) पेपर सेटिंग कमिटीचा भाग होती. त्यामुळे परीक्षेत कोणते प्रश्न येणार, याची तिला आधीच पूर्ण कल्पना होती. तिने या माहितीचा वापर करून पुण्यात विशेष कोचिंग क्लास चालवला होता.
या संपूर्ण प्रकरणाचा पुढील तपास सीबीआय करत असून, यामध्ये आणखी काही मोठे चेहरे समोर येण्याची शक्यता वर्तवली जात आहे.
