नांदेड, १६ जुलै प्रतिनिधी
महाराष्ट्र राज्यात विशेष सखोल पुनरीक्षण (SIR) कार्यक्रमासाठी मुदतवाढ मिळाल्याचा एक चुकीचा संदेश सध्या समाजमाध्यमांवर (सोशल मीडिया) मोठ्या प्रमाणावर प्रसारित होत आहे. मात्र, असा कोणताही मुदतवाढीचा निर्णय झालेला नसून नागरिकांनी अफवांवर विश्वास ठेवू नये, असे स्पष्टीकरण प्रशासनातर्फे देण्यात आले आहे. महाराष्ट्र राज्यासाठी विशेष सखोल पुनरीक्षण कार्यक्रमास अद्याप कोणतीही मुदतवाढ देण्यात आलेली नाही, असे जिल्हाधिकारी तथा जिल्हा निवडणूक अधिकारी राहुल कर्डिल यांनी स्पष्ट केले आहे.
२९ जुलै २०२६ हीच अंतिम मुदत
निवडणूक विभागाने दिलेल्या माहितीनुसार, या कार्यक्रमांतर्गत सर्व पात्र मतदारांनी २९ जुलै २०२६ पर्यंत आपल्या संबंधित बूथ लेव्हल अधिकारी (BLO) यांच्याकडे गणना पत्रक (Enumeration Form – EF) भरून जमा करणे बंधनकारक आहे. अंतिम मुदत जवळ येत असल्याने सर्व पात्र मतदारांनी विहित मुदतीत आपले अर्ज सादर करून निवडणूक विभागास सहकार्य करावे, असे आवाहन करण्यात आले आहे.
महत्त्वाची नोंद: या सूचनेची सर्व पात्र मतदार, बूथ लेव्हल एजंट (BLO), लोकप्रतिनिधी तसेच निवडणूक विभागातील सर्व अधिकारी व कर्मचाऱ्यांनी गांभीर्याने नोंद घ्यावी.
चुकीचे संदेश पसरवणाऱ्यांवर कारवाईचा इशारा; अफवांवर विश्वास न ठेवण्याचे आवाहन
जिल्हाधिकारी राहुल कर्डिल यांनी नागरिकांना व लोकप्रतिनिधींना सतर्क राहण्याचे आवाहन केले आहे. एस.आय.आर. कार्यक्रमाबाबत कोणतीही अप्रमाणित किंवा चुकीची माहिती, दिशाभूल करणारे संदेश, वृत्त किंवा बातम्या समाजमाध्यमांवर प्रसारित अथवा शेअर करू नयेत. केवळ अधिकृत सूत्रांकडून आलेल्या माहितीलाच प्राधान्य द्यावे आणि कोणत्याही प्रकारच्या अफवांना बळी पडू नये, असे जिल्हा निवडणूक अधिकाऱ्यांनी ठणकावून सांगितले आहे.
वृत्त प्रतिनिधी: माधव वाघमारे, नांदेड.
