नांदेड १६ जुलै (प्रतिनिधी माधव वाघमारे)
नांदेड जिल्ह्यातील फरार आणि वॉरंटमधील आरोपींचा शोध घेऊन त्यांना तात्काळ जेरबंद करण्याचे कडक निर्देश पोलीस अधीक्षक मा. श्री. डॉ. नीलाभ रोहन यांनी दिले आहेत. या सूचनेचे तंतोतंत पालन करत नांदेड स्थानिक गुन्हे शाखेच्या (एलसीबी) पथकाने एक मोठी आणि कौतुकास्पद कामगिरी केली आहे. बारड पोलीस ठाण्याच्या हद्दीतील गंभीर गुन्ह्यातील आणि तब्बल ९ वर्षांपासून पोलिसांना हुलकावणी देणाऱ्या एका अट्टल आरोपीला तेलंगणातील हैद्राबाद येथून शिताफीने अटक करण्यात आली आहे.
नेमकी काय आहे घटना?
बारड पोलीस ठाण्यात दाखल असलेल्या एका गंभीर गुन्ह्यात (गु.र.नं. १३४/२०१७ कलम ३७६(२)(J)(N) भादंविसह कलम ३(A), ४, ५(J), ६ पोक्सो ॲक्ट) आरोपी दौलतखान आन्वरखान पठाण (वय ३९ वर्षे, व्यवसाय- ऑटोचालक, रा. नागेली, ता. मुदखेड, जि. नांदेड) हा गेल्या ९ वर्षांपासून पोलिसांना चकवा देऊन फरार होता. त्याच्याविरुद्ध न्यायालयातून स्टँडिंग वॉरंट / NBW वॉरंट जारी करण्यात आले होते.
गुन्हे शाखेने रचले जाळे
स्थानिक गुन्हे शाखेचे पोलीस निरीक्षक श्री. अतुल भोसले यांनी फरार आरोपींचा शोध घेण्यासाठी पोउपनि/ नागनाथ तुकडे व त्यांच्या पथकाला विशेष आदेश दिले होते. दरम्यान, दिनांक १५ जुलै २०२६ रोजी पथकाला गोपनीय आणि खात्रीशीर बातमीदाराकडून माहिती मिळाली की, सदर आरोपी हैद्राबाद येथे लपून बसला आहे.
मिळालेल्या माहितीची खातरजमा करून वरिष्ठांच्या परवानगीने पथकाने तात्काळ हैद्राबाद गाठले. तेथे शोध मोहीम राबवून बल्लागुडा, चंद्रानगुट्टा, हैद्राबाद (तेलंगणा) येथून आरोपी दौलतखान आन्वरखान पठाण याला ताब्यात घेण्यात आले. पुढील कायदेशीर कारवाईसाठी आरोपीला बारड पोलिसांच्या स्वाधीन करण्यात आले आहे.
या पथकाने बजावली कामगिरी
ही धडाकेबाज कामगिरी मा. डॉ. नीलाभ रोहन (पोलीस अधीक्षक, नांदेड) आणि श्री. अतुल भोसले (पोलीस निरीक्षक, स्थागुशा) यांच्या मार्गदर्शनाखाली खालील पथकाने यशस्वीरीत्या पार पाडली:
- पोलीस उपनिरीक्षक: श्री. नागनाथ तुकडे
- सहायक पोलीस उपनिरीक्षक: दारासिंग राठोड
- पोलीस अंमलदार: मोहन हाक्के, सुनिल गटनेवार, महेश बडगू (स्थानिक गुन्हे शाखा, नांदेड)
- सायबर सेलचे पोलीस अंमलदार: राजू सिटीकर, दिपक ओढणे
या धडक कारवाईमुळे गुन्हेगारांमध्ये चांगलीच धडकी भरली असून, नांदेड पोलिसांच्या या कामगिरीचे सर्वत्र कौतुक होत आहे.
