नांदेड |११ प्रतिनिधी माधव वाघमारे
गोदावरी नदी पात्रातील अवैध रेती उपसा व वाहतुकीविरोधात नांदेड ग्रामीण पोलिसांनी मोठी कारवाई करत रेती माफियांवर निर्णायक घाव घातला आहे. या कारवाईत एका ट्रकसह सुमारे 40 लाख 25 हजार रुपयांचा मुद्देमाल जप्त करण्यात आला असून, संबंधित चालकाविरोधात गुन्हा दाखल करण्यात आला आहे.
नांदेड ग्रामीण पोलीस ठाण्याच्या हद्दीत 10 फेब्रुवारी 2026 रोजी सायंकाळी 7.30 वाजण्याच्या सुमारास गोपनीय माहितीच्या आधारे ही कारवाई करण्यात आली. वांगी ते वाजेगाव बायपास रोडवर पोलिसांनी सापळा रचून संशयित टाटा हायवा ट्रक (MH 26 BE 2878) थांबवला. तपासणीदरम्यान वाहनामध्ये अंदाजे 5 ब्रास अवैध रेती (वाळू) वाहतूक होत असल्याचे आढळून आले.
या प्रकरणात ट्रकची किंमत सुमारे 40 लाख रुपये तर रेतीची किंमत 25 हजार रुपये अशी एकूण 40,25,000 रुपयांचा मुद्देमाल जप्त करण्यात आला आहे. वाहन चालक सुनील देविदास ताळ (वय 30, व्यवसाय – चालक, रा. वांगी, ता. जि. नांदेड) याच्याविरोधात भा.दं.वि. कलम 303(2), 3(5) तसेच महाराष्ट्र जमीन महसूल अधिनियम 48(7), 48(8) अन्वये गुन्हा दाखल करण्यात आला आहे.
ही कारवाई पोलीस अधीक्षक श्री. अबिनाश कुमार यांच्या मार्गदर्शनाखाली, अप्पर पोलीस अधीक्षक श्रीमती अर्चना पाटील (भोकर), अप्पर पोलीस अधीक्षक सूरज गुरव (नांदेड) व उपविभागीय पोलीस अधिकारी प्रशांत शिंदे (इतवारा) व पो नि ओमकांत चिंचोलकर यांच्या निर्देशनाखाली पार पडली. नांदेड ग्रामीण पोलीस ठाण्याचे अधिकारी व अंमलदारांनी संयुक्तपणे ही धडक कारवाई केली.
दरम्यान, अवैध रेती उपसा व वाहतुकीविरोधात पुढील काळातही कठोर कारवाई सुरूच राहणार असल्याचा इशारा पोलिस प्रशासनाने दिला आहे. या कारवाईमुळे परिसरातील रेती माफियांमध्ये खळबळ उडाली आहे.
