नंदीनगर येथील तरुणाच्या खून प्रकरणातील १२ आरोपांना अवघ्या काही तासांत ठोकल्या बेड्या

  प्रतिनिधी, माधव वाघमारे दिनांक २९ ऑक्टोंबर

मुदखेड: दिनांक २८ ऑक्टोबर २०२६ रोजी दुपारी नंदीनगर, मुदखेड येथे जुन्या भांडणाच्या कारणावरून भीमराव नकलवाड आणि शेषराव उर्फ केशव नकलवाड या दोन गटांमध्ये वाद झाला. हा वाद सोडवण्यासाठी गेलेल्या अर्जुनावर प्राणघातक हल्ला झाल्याची गंभीर घटना घडली होती. या प्रकरणी मुदखेड पोलिसांनी अवघ्या काही तासांत तब्बल १२ जणांना अटक केली आहे.

घटनेचा सविस्तर तपशील:

दिनांक २८ ऑक्टोबर २०२६ रोजी दुपारी नंदीनगर येथे दोन गटांमध्ये सुरू असलेले भांडण सोडवण्यासाठी गल्लीतील इतर लोकांसह अर्जुन उर्फ अजय शिवाजी नकलवाड (वय २० वर्षे, रा. नंदीनगर, मुदखेड) हा तरुण मध्यस्थी करण्यासाठी गेला होता. त्यावेळी दंगा करणाऱ्या आरोपींनी अर्जुनच्या छातीवर दगड व विटांनी जबर मारहाण केली. या मारहाणीत अर्जुन गंभीर जखमी होऊन जमिनीवर कोसळला. त्याला तात्काळ उपचारासाठी ग्रामीण रुग्णालय, मुदखेड येथे दाखल केले असता, वैद्यकीय अधिकाऱ्यांनी तपासून तो मरण पावल्याचे घोषित केले.

या प्रकरणी मयताची आई सौ. लक्ष्मीबाई शिवाजी नकलवाड यांनी दिलेल्या फिर्यादीवरून मुदखेड पोलीस ठाण्यात गुन्हा रजिस्टर क्रमांक २२७/२०२६ कलम १०३(१), १८९(२), १९०, १९१(२) भारतीय न्याय संहिता (BNS) अन्वये गुन्हा नोंदवण्यात आला आहे.

पोलिसांची धडक कारवाई:

गुन्ह्याचे गांभीर्य लक्षात घेऊन पोलीस अधीक्षक मा. डॉ. नीलाहम रोहन, अप्पर पोलीस अधीक्षक मा. श्रीमती अर्चना पाटील व उपविभागीय पोलीस अधिकारी मा. माणिक बेद्रे यांच्या मार्गदर्शनाखाली मुदखेड पोलीस ठाण्याचे पोलीस निरीक्षक / गणेश कराड व त्यांच्या पथकाने अत्यंत वेगाने तपासाचक्रे फिरवली. गुन्ह्याची माहिती मिळताच पोलिसांनी रात्रीतून शोधमोहिम राबवून अवघ्या काही तासांच्या आत एकूण १२ आरोपींना ताब्यात घेतले.

अटक करण्यात आलेल्या आरोपींची नावे:

१. भीमराव चिमणा नकलवाड (वय ६५ वर्षे, रा. नंदीनगर, मुदखेड) २. सुभाश भीमराव नकलवाड (वय २४ वर्षे, रा. नंदीनगर, मुदखेड) ३. रमेश भीमराव नकलवाड (वय २७ वर्षे, रा. वसमत, ह.मु. नंदीनगर, मुदखेड) ४. राहुल भीमराव नकलवाड (वय २२ वर्षे, रा. चुडावा, ता. पूर्णा, जि. परभणी, ह.मु. नंदीनगर, मुदखेड) ५. बाबुशा भीमराव नकलवाड (वय ३५ वर्षे, रा. वसमत, जि. हिंगोली, ह.मु. नंदीनगर, मुदखेड) ६. शेषराव उर्फ केशव गोविंद नकलवाड (वय ६० वर्षे, रा. नंदीनगर, मुदखेड) ७. संभाजी शेषराव उर्फ केशव नकलवाड (वय २७ वर्षे, रा. नंदीनगर, मुदखेड) ८. मारोती शेषराव उर्फ केशव नकलवाड (वय २५ वर्षे, रा. नंदीनगर, मुदखेड) ९. अर्जुन उर्फ राजेश शेषराव उर्फ केशव नकलवाड (वय २० वर्षे, रा. नंदीनगर, मुदखेड) १०. अर्जुन उर्फ राजेश शेषराव उर्फ केशव नकलवाड (वय २० वर्षे, रा. नंदीनगर, मुदखेड) ११. रवि उर्फ मुन्ना नकलवाड (वय २१ वर्षे, रा. नंदीनगर, मुदखेड) १२. सुनिल भीमराव नकलवाड (वय २५ वर्षे, रा. नंदीनगर, मुदखेड)

गुन्ह्यातील सहभागाची खात्री पटल्यानंतर कायदेशीर प्रक्रिया पूर्ण करून त्यांना माननीय न्यायालयात हजर करण्यात येणार आहे.

सदरची यशस्वी कामगिरी पोलीस निरीक्षक गणेश कराड, सपोनि/कल्पना राठोड, पोउपनि/सुरेश जाधव, पोउपनि/राजेश नंद, पोउपनि/आकाश सरोदे व त्यांच्या पथकातील पोलीस अंमलदार यांनी पार पाडली आहे.