नांदेड | २ फेब्रुवारी प्रतिनिधी : माधव वाघमारे
नांदेड शहरात सार्वजनिक ठिकाणी दारू पिऊन गोंधळ घालणाऱ्या, शांतता भंग करणाऱ्या व्यक्तींविरोधात नांदेड पोलिसांनी कडक पावले उचलली आहेत. पोलीस अधीक्षक मा. श्री. अबिनाश कुमार यांच्या आदेशानुसार नांदेड सिटी स्ट्रिट सेफ्टी ड्राईव्ह अंतर्गत शहरातील विविध भागात विशेष मोहिम राबविण्यात आली.
या मोहिमेचे नेतृत्व अपर पोलीस अधीक्षक मा. श्री. सुरज गुरव यांच्या मार्गदर्शनाखाली करण्यात आले. शहरातील सार्वजनिक ठिकाणी होणाऱ्या गैरप्रकारांना आळा घालण्यासाठी सिटी स्ट्रिट सेफ्टी पथक, स्थानिक पोलीस ठाण्यांचे अधिकारी व कर्मचारी यांनी संयुक्तपणे कारवाई केली.
दिनांक 31 जानेवारी व 1 फेब्रुवारी 2026 रोजी शहरातील विविध पोलीस ठाण्यांच्या हद्दीत ही कारवाई करण्यात आली.
- भाग्यनगर पोलीस ठाणे हद्दीत पेट्रोलिंगदरम्यान कॅनॉल रोड व सम्राट चौक परिसरात सार्वजनिक ठिकाणी दारू पिताना आढळलेल्या इसमांवर मुंबई पोलीस कायद्यान्वये गुन्हे दाखल करण्यात आले.
- इतवारा पोलीस ठाणे हद्दीत जुना मोंढा परिसरात दारू पिणाऱ्यांवर कारवाई करण्यात आली.
- शिवाजीनगर पोलीस ठाणे हद्दीत रोडवर बुलेट वाहनावर मद्यधुंद अवस्थेत आढळलेल्या इसमाकडून ₹6,500 दंड वसूल करण्यात आला.
- नांदेड ग्रामीण पोलीस ठाणे हद्दीत एमआयडीसी परिसरात मद्यधुंद अवस्थेत सार्वजनिक शांतता भंग करणाऱ्यांवर कलम 110/117 अंतर्गत कारवाई झाली.
- दामिनी पथकाने विसावा गार्डन व विवेकानंदनगर परिसरात मद्यधुंद इसमांवर कठोर कारवाई केली.
या कारवाईदरम्यान अनेक दारूची दुकाने, वाईन शॉप्स व हॉटेल्सचीही तपासणी करण्यात आली.
पोलीस अधीक्षक मा. श्री. अबिनाश कुमार यांनी स्पष्ट इशारा दिला आहे की, नांदेड शहरात कोणत्याही सार्वजनिक ठिकाणी दारू पिणे, गोंधळ घालणे किंवा शांतता भंग करणे खपवून घेतले जाणार नाही. नियमांचे उल्लंघन करणाऱ्यांवर पुढेही कठोर कारवाई करण्यात येईल.
नांदेड पोलिसांच्या या कारवाईमुळे शहरातील कायदा व सुव्यवस्था अबाधित राहण्यास मदत होणार असून नागरिकांनीही सहकार्य करावे, असे आवाहन करण्यात आले आहे.
