नांदेड ४ फेब्रुवारी (प्रतिनिधी) माधव वाघमारे
मुख्यमंत्री समृद्ध पंचायतराज अभियान व महिला सक्षमीकरण मोहिमेअंतर्गत राबविण्यात येणाऱ्या यशस्वी उपक्रमांची माहिती घेण्यासाठी पंजाब राज्यातील ५० सदस्यीय पदाधिकारी पथकाने दि. ३१ जानेवारी रोजी बोंढार(नेरली) (ता. जि. नांदेड) येथे अभ्यास दौरा केला. या दौऱ्याचे आयोजन ग्रामपंचायत बोंढार यांच्या वतीने करण्यात आले होते.
यावेळी ग्रामपंचायत बोंढार तर्फे बोंढार(नेरली) येथे गुरु गोविंद सिंग महाराज यांच्या प्रतिमेची भेट देऊन पंजाबच्या पाहुण्यांचा सत्कार करण्यात आला. अभ्यास दौऱ्यादरम्यान ग्रामपंचायतीला मिळालेले आय.एस.ओ. मानांकन, ग्रामपंचायत कार्यालयातील पाणी शुद्धीकरण व्यवस्था, तसेच जिल्हा परिषद शाळेतील विद्यार्थ्यांचे सुस्वर गायन व वाचन पाहून पथकाने समाधान व्यक्त केले.
गावात राबविण्यात येणाऱ्या घर माझी मुलगी माझी शान लेक लाडकी” अभियानांतर्गत प्रत्येक घरावर मुलीचे नाव तसेच पती-पत्नींची नावे लिहिण्याचा अभिनव उपक्रम विशेष लक्षवेधी ठरला.
याशिवाय डिजिटल शाळा, डिजिटल अंगणवाडी, रेन हार्वेस्टिंग, शाळेसमोरील परसबाग, सी.सी. कॅमेरे, अंगणवाडी, स्मशानभूमी, सभागृह, महारुद्र हनुमान मंदिर व मंदिर परिसराचे सुशोभीकरण, तसेच पाहुण्यांच्या हस्ते वृक्षलागवड करण्यात आली.
गावातील घंटागाडी प्लास्टिक संकलन जाळी, कचरा विभाजन (सेग्रीगेशन) शेड नाडेप खड्डा आदी स्वच्छता व पर्यावरणपूरक उपक्रमांची प्रत्यक्ष पाहणी करण्यात आली. महिला सरपंच पथकाने संपूर्ण गावाची फेरफटका मारून पाहणी केली. गावातील स्वच्छता, नियोजनबद्ध विकास व सौंदर्यीकरण पाहून पंजाबच्या पथकाने ग्रामपंचायतीच्या कार्याचे मनापासून कौतुक केले.
ग्रामपंचायत मार्फत राबविण्यात येणाऱ्या विविध शासकीय योजना, त्यांची अंमलबजावणी व लाभार्थीपर्यंत पोहोच याची सविस्तर माहिती पाहुण्यांनी जाणून घेतली.
या प्रसंगी सरपंच मारोती वामन बागल, उपसरपंच राजूबाई व्यंकटराव आरसुळे, ग्रामपंचायत सदस्य शिवाजी केरबा शिंदे, कैलास पिराजी आरसुळे, नवनाथ शंकर आरसुळे, सुमित्राबाई चांदु आरसुळे, नंदाबाई देवराव कोकरे, अनिता यशवंत बैकरे, सदस्य देवराव जळबाजी कोकरे, पोलीस पाटील श्री. व्ही. बी. कांबळे, विस्तार अधिकारी, ग्रामपंचायत अधिकारी श्रीमती एम. आय. ऐनवार, केस तिडके, एम. जी. वाघमारे, मुख्याध्यापक श्रीमती सी. एम. लहाने, सहशिक्षक व्ही. एम. सावंत, एम. ए. राजूरकर, कृषी सहाय्यक संगीता तुकाराम पवार, अंगणवाडी कार्यकर्ती गंगाबाई देविदास पांचाळ, मदतनीस, महिला बचत गट मंडळ, ग्रामपंचायत कर्मचारी व सर्व ग्रामस्थ मोठ्या संख्येने उपस्थित होते.
संपूर्ण अभ्यास दौऱ्यादरम्यान व्ही. बी. कांबळे (पंचायत) विस्तार अधिकारी यांनी समन्वयाची महत्त्वपूर्ण भूमिका पार पाडली.
हा अभ्यास दौरा ग्रामपंचायत बोंढारच्या सर्वांगीण विकासाची प्रभावी ओळख करून देणारा ठरला.
