प्रतिनिधी : माधव वाघमारे
नांदेड | दि. १७ फेब्रुवारी २०२६
गोदावरी नदीच्या पात्रात बेकायदेशीररीत्या रेती उपसा व वाहतूक करणाऱ्या रेती माफियांविरोधात नांदेड ग्रामीण पोलिसांनी मोठी कारवाई करत तब्बल १० लाख ७५ हजार रुपयांचा मुद्देमाल जप्त केला आहे. पर्यावरणाचा ऱ्हास थांबवण्यासाठी राबविण्यात येत असलेल्या ‘ऑपरेशन फ्लॅश आऊट’ अंतर्गत ही धडक कारवाई करण्यात आली.
गोदावरी नदी पात्रातील मार्कंड शिवरात दिनांक १६ फेब्रुवारी २०२६ रोजी सायंकाळी ७.३० वाजण्याच्या सुमारास पोलिसांना गोपनीय माहिती मिळाली. या माहितीच्या आधारे नांदेड ग्रामीण पोलीस ठाण्याच्या पथकाने तात्काळ छापा टाकला. कारवाईदरम्यान नदी पात्रातून अवैधरीत्या रेती काढत असल्याचे निदर्शनास आले.
पोलिसांनी घटनास्थळी अंदाजे ५ ब्रास रेती (किंमत २५ हजार रुपये), एक जेसीबी (३ लाख रुपये) व एक ट्रॅक्टर-ट्रॉली (७ लाख ५० हजार रुपये) असा एकूण १०.७५ लाख रुपयांचा मुद्देमाल ताब्यात घेतला. याप्रकरणी बाबुराव श्रीसागर बालाजी केशवराव लामदाडे (वय २३, व्यवसाय – शेती), मदन येवले (रा. मार्कंड) तसेच दोन इतर अनोळखी व्यक्ती यांच्याविरुद्ध गुन्हा दाखल करण्यात आला आहे.
आरोपींवर भादंवि कलम ३०३(२), ३(५) सह महाराष्ट्र जमीन महसूल अधिनियम, पर्यावरण संरक्षण अधिनियम तसेच सार्वजनिक संपत्ती नुकसान प्रतिबंधक अधिनियम अंतर्गत कारवाई करण्यात आली आहे. गुन्हा दाखल करून पुढील तपास सुरू आहे.
ही कारवाई पोलीस अधीक्षकअबिनाश कुमार नांदेड यांच्या मार्गदर्शनाखाली, अप्पर पोलीस अधीक्षक अर्चना पाटील भोकर व नांदेड, तसेच अप्पर पोलीस अधीक्षक सुरज गुरव उपविभागीय पोलीस अधिकारी इतवारा प्रशांत शिंदे यांच्या देखरेखीखाली पो नि ओमकांत चिंचोलकर पो कॉन्स्टेबल विठ्ठल शिंदे आसिफ जमीर नांदेड ग्रामीण पोलीस ठाण्याच्या अधिकारी व कर्मचाऱ्यांनी यशस्वीरीत्या पार पाडली.
नांदेड जिल्ह्यात अवैध रेती उपसा व वाहतुकीविरोधात पुढील काळातही कठोर कारवाई केली जाणार असल्याचा इशारा पोलिस प्रशासनाने दिला आहे.
