प्रतिनिधी, माधव वाघमारे
नांदेड, दि. २४ फेब्रुवारी: दक्षिण मध्य रेल्वेच्या नांदेड विभागातील तीन कर्मचाऱ्यांनी दाखवलेल्या सतर्कतेमुळे मोठ्या रेल्वे अपघातांना आळा बसला असून, त्यांच्या या कामगिरीबद्दल त्यांना महाव्यवस्थापक स्तरावरील प्रतिष्ठेचा ‘एम्प्लॉयी ऑफ द मंथ’ (महिन्यातील सर्वोत्तम कर्मचारी) सुरक्षा पुरस्कार जाहीर झाला आहे. सिकंदराबाद येथे झालेल्या एका विशेष कार्यक्रमात हा पुरस्कार प्रदान करण्यात आला.
दिनांक २३ फेब्रुवारी रोजी झालेल्या या सोहळ्यात दक्षिण मध्य रेल्वेचे महाव्यवस्थापक श्री संजय कुमार श्रीवास्तव यांच्या हस्ते हा पुरस्कार देण्यात आला. यावेळी नांदेडचे विभागीय रेल्वे व्यवस्थापक श्री प्रदीप कामले तसेच विभागातील वरिष्ठ अधिकारी आणि झोनमधील इतर विभागप्रमुखांनी व्हिडिओ कॉन्फरन्सिंगद्वारे सहभाग नोंदवला.
जानेवारी २०२६ महिन्यासाठी जाहीर झालेल्या या पुरस्काराने सन्मानित होणाऱ्या कर्मचाऱ्यांमध्ये ऑपरेटिंग विभागातील पॉइंट्समन तसेच अभियांत्रिकी विभागातील दोन ट्रॅक मेंटेनर यांचा समावेश आहे. त्यांच्या कामगिरीचा तपशील खालीलप्रमाणे:
१. श्री दिलराज मीणा (पॉइंट्समन, बोल्डा): दिनांक २० जानेवारी रोजी बोल्डा स्थानकावर गाडी क्र. 17642 एक्सप्रेस सुटण्याच्या प्रतीक्षेत असताना श्री मीणा यांनी कोच क्रमांक B-2 जवळ एक भाग लोंबकळत असल्याचे पाहिले. तातडीने तपासणी केली असता आर्म बॉटम कव्हरचे बोल्ट निघून गेल्याने पुढील ट्रॉली लोंबकळत असल्याचे त्यांच्या निदर्शनास आले. त्यांनी त्वरित वरिष्ठांना याची माहिती दिल्याने संभाव्य मोठी दुर्घटना टळली आणि शेकडो प्रवाशांचे प्राण वाचले.
२. श्री इंगोले अमोल (ट्रॅक मेंटेनर-III, बोल्डा): दिनांक ११ जानेवारी रोजी सकाळी बोल्डा-सिरली दरम्यान ओएचई पोल क्र. ९०१/१५-१६ जवळ फिरत असताना त्यांना एफबी वेल्ड फेल्युअर (रुळाची वेल्ड तुटल्याचे) आढळून आले. त्यांनी चोख कामगिरी करत तात्काळ लाकडी ब्लॉक देऊन, सैल फिटिंग्ज घट्ट करून आणि आपत्कालीन क्लॅम्प बसवून ट्रॅकचे संरक्षण केले. अधिकारी घटनास्थळी पोहोचेपर्यंत त्यांनी ही परिस्थिती नियंत्रणात ठेवली, ज्यामुळे मोठा अनर्थ टळला.
३. श्री सुरेश मस्के (ट्रॅक मेंटेनर-II, बसमत): दिनांक १२ जानेवारी रोजी सकाळी बसमत-माळसेलू दरम्यान पहाटेच्या वेळी फिरत असताना त्यांनीही अशाच प्रकारचे एफबी वेल्ड फेल्युअर शोधून काढले. त्यांनी तातडीने लाकडी ब्लॉक देऊन ट्रॅकचे संरक्षण केले व सैल फिटिंग्ज घट्ट करून गंभीर सुरक्षाधोका टाळला.
महाव्यवस्थापक श्री संजय कुमार श्रीवास्तव यांनी या तिन्ही कर्मचाऱ्यांच्या समर्पण, दक्षता आणि प्रसंगावधान राखून केलेल्या कामगिरीचे कौतुक केले. अशा कार्यामुळे दक्षिण मध्य रेल्वेमध्ये सुरक्षेची मजबूत संस्कृती निर्माण होण्यास मदत होत असल्याचे ते म्हणाले.
नांदेड विभागाच्या वतीने या तिन्ही कर्मचाऱ्यांचे अभिनंदन करण्यात आले असून त्यांच्या उज्ज्वल भवितव्यासाठी शुभेच्छा देण्यात आल्या आहेत. हे कर्मचारी इतर सहकाऱ्यांसाठी आदर्श ठरले आहेत.
