महालक्ष्मी मंदिर परिसरातून धारदार तलवारीसह एकास अटक

कुंडलवाडी ४ एप्रिल (प्रतिनिधी)
प्रतिबंधित असलेले लोखंडी धारदार शस्त्र बाळगणाऱ्यांविरुद्ध नांदेड पोलिसांनी कडक मोहीम हाती घेतली आहे. या मोहिमेअंतर्गत कुंडलवाडी पोलिसांनी गुप्त बातमीदाराच्या माहितीवरून सापळा रचून महालक्ष्मी मंदिर परिसरातून एका १९ वर्षीय तरुणाला धारदार तलवारीसह रंगेहात पकडले. या कारवाईत पोलिसांनी तलवारीसह एकूण २१,००० रुपयांचा मुद्देमाल जप्त केला आहे.
नेमकी घटना काय?
नांदेडचे पोलीस अधीक्षक अबिनाश कुमार यांनी जिल्ह्यातील सर्व पोलीस ठाण्यांना अवैध शस्त्र बाळगणाऱ्यांविरुद्ध कारवाई करण्याचे आदेश दिले होते. या आदेशानुसार, दिनांक ४ एप्रिल २०२६ रोजी कुंडलवाडी पोलीस ठाण्याचे सहाय्यक पोलीस निरीक्षक ज्ञानेश्वर शिंदे व त्यांचे पथक गस्तीवर होते. गस्तीदरम्यान त्यांना गोपनीय बातमीदाराकडून माहिती मिळाली की, कुंडलवाडी येथील महालक्ष्मी मंदिर परिसरात एक संशयास्पद तरुण वावरत असून त्याच्याकडे घातक शस्त्र आहे.
मिळालेल्या माहितीची शहानिशा करण्यासाठी पोलिसांनी पंचासह संबंधित ठिकाणी धाड टाकली. तेथे हर्ष उर्फ हर्षसिंग हणमंत इंगळे (वय १९ वर्षे, रा. गल्ली नं. १२, इंदिरा नगर, तरोडा बुद्रुक, नांदेड) हा तरुण संशयास्पद स्थितीत मिळून आला.
मुद्देमाल जप्त
पोलिसांनी आरोपीची अंगझडती घेतली असता, त्याच्याकडे खालील मुद्देमाल सापडला:
१) लोखंडी तलवार: सुमारे ३१ इंच लांबीची, ज्याचे पाते २७ इंच असून अत्यंत धारदार आहे. (किंमत ६,००० रु.)
२) तलवारीचे म्यान: ३४ इंच लांबीचे काळ्या रंगाचे प्लायवूड म्यान. (किंमत ५,०० रु.)
३) मोबाईल: १०,००० रुपये किमतीचा विवो कंपनीचा मोबाईल.
कायदेशीर कारवाई
विनापरवाना आणि बेकायदेशीररित्या गंभीर गुन्हा करण्याच्या उद्देशाने शस्त्र बाळगल्याप्रकरणी आरोपीविरुद्ध कुंडलवाडी पोलीस ठाण्यात गुन्हा रजिस्टर क्रमांक ४१/२०२६ नुसार, भारतीय हत्यार कायदा कलम ४/२५ सह महाराष्ट्र पोलीस अधिनियम कलम १३५ अन्वये गुन्हा दाखल करण्यात आला आहे.
यांनी केली कारवाई
ही कामगिरी पोलीस अधीक्षक अबिनाश कुमार, अप्पर पोलीस अधीक्षक अर्चना पाटील (भोकर), अप्पर पोलीस अधीक्षक सुरज गुरव (नांदेड), आणि उपविभागीय पोलीस अधिकारी दशरथ पाटील (धर्माबाद) यांच्या मार्गदर्शनाखाली पार पडली. कारवाईत सपोनि ज्ञानेश्वर शिंदे, पोलीस अंमलदार माधव पाटील, रघुवीरसिंह चौहान आणि व्यंकट घोंगडे यांचा समावेश होता.
या यशस्वी कामगिरीबद्दल पोलीस अधीक्षक अबिनाश कुमार यांनी कुंडलवाडी पोलिसांचे कौतुक केले आहे.
प्रतिनिधी माधव वाघमारे