हिंगोली २९ जून प्रतिनिधी
नागरिकांच्या तक्रारी समजून घेऊन त्यांचा जलद निपटारा करणे, पोलीस आणि जनता यांच्यातील संवाद वाढवणे आणि लोकाभिमुख कामकाजाद्वारे जनतेचा पोलिसांवरील विश्वास दृढ करणे, या उद्देशाने नांदेड परिक्षेत्राचे पोलीस उप महानिरीक्षक (DIG) श्री शहाजी उमाप यांनी परिक्षेत्रातील चारही जिल्ह्यांत ‘जनसंवाद’ उपक्रम सुरू केला आहे. या उपक्रमांतर्गत आज, २९ जून रोजी हिंगोली येथे तक्रारदारांशी थेट संवाद साधण्यात आला.

मासिक आढावा आणि जनसंवाद

पोलीस उप महानिरीक्षक हे परिक्षेत्रातील चारही जिल्ह्यांच्या कामगिरीचा आढावा घेण्यासाठी दरमहा जिल्हा मुख्यालयांना भेटी देत असतात. याच अनुषंगाने आज २९ जून रोजी हिंगोली येथील पोलीस अधीक्षक कार्यालयात जिल्हा पोलिसांच्या कामकाजाचा मासिक आढावा घेण्यात आला. त्यानंतर दुपारी ०२:३० ते ०४:०० या वेळेत श्री शहाजी उमाप यांनी जिल्ह्यातील तक्रारदारांशी थेट ‘संवाद’ साधला.

१३ तक्रारदारांनी मांडल्या अडचणी

या जनसंवाद उपक्रमादरम्यान एकूण १३ तक्रारदारांनी प्रत्यक्ष भेटून आपले लिखित अर्ज पोलीस उप महानिरीक्षकांकडे सोपवले. यामध्ये मुख्यत्वे:

• मारहाणी संदर्भातील तक्रारी
• सायबर फसवणुकीचे गुन्हे
• दाखल गुन्ह्यांच्या तपासाबाबतच्या अडचणी
  या व इतर विविध समस्यांचा यात समावेश होता. श्री उमाप यांनी या सर्व तक्रारींची गांभीर्याने दखल घेत, त्यांच्या शीघ्र सोडवणुकीसाठी संबंधित उपविभागीय पोलीस अधिकारी (SDPO) व पोलीस ठाणे प्रभारी अधिकाऱ्यांना आवश्यक त्या सूचना घटनास्थळीच दिल्या.

‘संवेदना’ पोर्टलद्वारे होणार पाठपुरावा

तक्रारदारांकडून प्राप्त होणाऱ्या अर्जांचे जलद निवारण व्हावे यासाठी पोलीस उप महानिरीक्षक कार्यालयाने यापूर्वीच ‘संवेदना’ ही तक्रार निवारण प्रणाली सुरू केली आहे. आजच्या ‘जनसंवाद’ उपक्रमात आलेले सर्व अर्ज ‘संवेदना’ पोर्टलच्या माध्यमातून पुढील चौकशी व कारवाईसाठी संबंधित अधिकाऱ्यांकडे वर्ग करण्यात येणार आहेत. विशेष म्हणजे, प्रत्येक तक्रारीवर काय कारवाई झाली, याचा आढावा नांदेड परिक्षेत्र कार्यालयातील फीडबॅक टीममार्फत घेतला जाणार आहे.

वरिष्ठ अधिकाऱ्यांची उपस्थिती

या जनसंवाद व आढावा बैठकीप्रसंगी हिंगोलीचे पोलीस अधीक्षक श्री श्रेणिक लोढा, अपर पोलीस अधीक्षक श्री कमलेश मीना, उपविभागीय पोलीस अधिकारी (वसमत) आणि शहरातील पोलीस स्टेशनचे प्रभारी अधिकारी उपस्थित होते.
विशेष प्रतिनिधी: माधव वाघमारे