नांदेड ११ जुलै (प्रतिनिधी, माधव वाघमारे) :– भारत निवडणूक आयोगाच्या निर्देशानुसार नांदेड दक्षिण विधानसभा मतदारसंघात सध्या ‘विशेष सखोल पुनर्निरिक्षण’ (SIR) कार्यक्रम अत्यंत प्रभावीपणे राबविला जात आहे. जिल्हा निवडणूक अधिकारी तथा जिल्हाधिकारी राहुल कर्डिले यांच्या मार्गदर्शनाखाली सुरू असलेल्या या मोहिमेचा एक भाग म्हणून शनिवारी (दि. ११ जुलै) शहरातील ऐतिहासिक गुरुद्वारा परिसर आणि सराफा गल्ली येथील दरबार मस्जिद परिसरात विशेष शिबिरांचे आयोजन करण्यात आले होते. या शिबिरांना नागरिकांनी आणि मतदारांनी उत्स्फूर्त प्रतिसाद दिला.
या दोन्ही महत्त्वपूर्ण ठिकाणच्या शिबिरांना मतदार नोंदणी अधिकारी तथा उपविभागीय अधिकारी डॉ. सचिन खल्लाळ आणि सहायक मतदार नोंदणी अधिकारी तथा तहसीलदार संजय वारकड यांनी प्रत्यक्ष भेट देऊन कामकाजाची सविस्तर पाहणी केली. यावेळी त्यांनी उपस्थित मतदान केंद्रस्तरीय अधिकारी (BLO) व कर्मचाऱ्यांना मार्गदर्शन करताना, एकही पात्र मतदार नोंदणीपासून वंचित राहणार नाही याची दक्षता घेण्याचे निर्देश दिले.
उपविभागीय अधिकाऱ्यांचा थेट सहभाग, गुरुद्वारात जनजागृती
गुरुद्वारा परिसरातील शिबिराला भेट दिली असता, डॉ. सचिन खल्लाळ यांनी स्वतः पुढाकार घेत काही मतदारांचे ‘इन्युमरेशन फॉर्म’ (Enumeration Form) बीएलओच्या मोबाईल ॲपद्वारे जागेवरच भरून घेतले. प्रशासकीय अधिकाऱ्याचा हा थेट सहभाग पाहून नागरिकांचा उत्साह वाढला. यावेळी डॉ. खल्लाळ यांनी उपस्थित सामाजिक कार्यकर्त्यांशी संवाद साधून, ‘एसआयआर’ प्रक्रियेची माहिती समाजातील शेवटच्या घटकापर्यंत पोहोचवण्यासाठी सहकार्य करण्याचे आवाहन केले.
दरबार मस्जिदीत बैठक; ‘ॲनॉमली’बाबत संभ्रम दूर
यानंतर सराफा गल्लीतील प्रसिद्ध दरबार मस्जिद परिसरात महसूल व निवडणूक प्रशासनाच्या वतीने विशेष बैठक घेण्यात आली. या बैठकीला इमाम साहेब, मस्जिदचे प्रतिनिधी आणि परिसरातील प्रमुख सामाजिक कार्यकर्ते मोठ्या संख्येने उपस्थित होते.
या बैठकीत मतदारांच्या मनातील विविध शंकांचे निरसन करण्यात आले. अनेक मतदारांच्या मनात ‘ॲनॉमली’ (Anomaly – मतदार यादीतील त्रुटी/विसंगती) संदर्भात मोठा संभ्रम असल्याचे प्रशासनाच्या निदर्शनास आले होते. यावर डॉ. सचिन खल्लाळ व तहसीलदार संजय वारकड यांनी उपस्थितांना अत्यंत सोप्या भाषेत कायदेशीर तरतुदी समजावून सांगत सर्व प्रश्नांची समाधानकारक उत्तरे दिली.
धार्मिक व सामाजिक प्रतिनिधींचे सहकार्याचे आश्वासन
या शिबिरांच्या माध्यमातून सर्व पात्र नागरिकांनी आपले ‘इन्युमरेशन फॉर्म’ वेळेत भरून देण्याचे आवाहन प्रशासनाने केले आहे. या आवाहनाला प्रतिसाद देत, दरबार मस्जिदीच्या माध्यमातून आणि धार्मिक व्यासपीठावरून ‘SIR’ मोहिमेबाबत समाजात आवश्यक ती जनजागृती केली जाईल, असे आश्वासन इमाम साहेबांनी प्रशासनाला दिले.
नागरिकांना प्रशासनाचे आवाहन
“नांदेड दक्षिण मतदारसंघातील प्रत्येक पात्र नागरिकाने या ‘विशेष सखोल पुनर्निरिक्षण’ (SIR) प्रक्रियेत सक्रिय सहभाग नोंदवावा. आपले फॉर्म वेळेत भरून देण्यासोबतच आपल्या परिसरातील इतर नागरिकांनाही यासाठी प्रेरित करावे, जेणेकरून एक शुद्ध आणि पारदर्शक मतदार यादी तयार होण्यास मदत होईल.”
– जिल्हा प्रशासन, नांदेड.
