नांदेड उत्तरमध्ये छत्रपती शिवाजी महाराज महाराजस्व समाधान शिबिर उत्साहात हजारो नागरिकांना एकाच छताखाली थेट लाभ

प्रतिनिधी : माधव वाघमारे
नांदेड : २६ जुलै रविवार
महाराष्ट्र राज्याचे मुख्यमंत्री देवेंद्र फडणवीस यांच्या वाढदिवसानिमित्त आणि माजी उपमुख्यमंत्री स्व. अजितदादा पवार यांच्या जयंतीचे औचित्य साधून महसूल प्रशासन पूर्ण क्षमतेने जनतेच्या दारी पोहचले आहे. राज्याचे महसूल मंत्री चंद्रशेखर बावनकुळे यांच्या निर्देशानुसार व नांदेडचे जिल्हाधिकारी राहुल कर्डीले यांच्या मार्गदर्शनाखाली नांदेड उत्तर विधानसभा मतदारसंघातील ए. के. संभाजी मंगल कार्यालय येथे आयोजित ‘छत्रपती शिवाजी महाराज महसूल समाधान शिबिर अभियान’ अत्यंत उत्साहात आणि नागरिकांच्या भरघोस प्रतिसादात पार पडले.
नागरिकांना शासनाच्या विविध लोककल्याणकारी योजना व प्रशासकीय सेवा ‘एकाच छताखाली आणि एकाच दिवशी’ मिळवून देणे हा या शिबिराचा मुख्य उद्देश होता. या अभियानात महसूल, पुरवठा, कृषी, भूमी अभिलेख, आरोग्य, पंचायत समिती, महिला आर्थिक विकास महामंडळ (माविम), उमेद ग्रामीण जीवनोन्नती अभियान, सायबर सेल, भरोसा सेल, रेशीम विभाग, महावितरण, पशुसंवर्धन, परिवहन, जिल्हा उद्योग केंद्र आणि प्रधानमंत्री स्वनिधी योजना यांसारख्या अनेक शासकीय विभागांनी एकत्र येत नागरिकांना मार्गदर्शन, अर्ज स्वीकृती व सेवांचे वाटप केले.

प्रमुख वैशिष्ट्ये आणि मिळालेला प्रतिसाद

• ३,६५८ नागरिकांचा उत्स्फूर्त सहभाग: शिबिरास तब्बल ३,६५८ नागरिकांनी भेट देऊन विविध योजनांची माहिती व प्रशासकीय सेवांचा लाभ घेतला.
• ९३२ लाभार्थ्यांना प्रत्यक्ष लाभ: विविध योजनांअंतर्गत अर्ज केलेल्या ९३२ पात्र लाभार्थ्यांना जागेवरच प्रमाणपत्रे व थेट लाभ हस्तांतरित करण्यात आले.
• २,७५८ नागरिकांची मोफत आरोग्य तपासणी: डॉ. शंकरराव चव्हाण शासकीय वैद्यकीय महाविद्यालय व रुग्णालय (विष्णुपुरी) यांच्या विशेष सहकार्याने मोफत आरोग्य तपासणी शिबिर घेण्यात आले, ज्याचा २,७५८ नागरिकांनी लाभ घेतला. सोबतच, सामाजिक बांधिलकी जपत भव्य रक्तदान शिबिर पार पडले.

विविध दाखले व योजनांचे वाटप

या शिबिरादरम्यान जिवंत सातबारा, महिला शेतकरी प्रमाणपत्र, ईडब्ल्यूएस (EWS), उत्पन्न दाखला, जात प्रमाणपत्र, नॉन-क्रिमीलेअर, भूमिहीन दाखला, रहिवासी प्रमाणपत्र, जन्म-मृत्यू दाखले आणि रेशन कार्ड यांसारखी महत्त्वाची कागदपत्रे वितरीत करण्यात आली.
तसेच प्रधानमंत्री आवास योजना, रमाई आवास योजना, प्रधानमंत्री मातृ वंदना योजना, लेक लाडकी योजना, लखपती दीदी योजना, बचत गट कर्जवाटप, स्वामित्व योजना व कृषी विभागाच्या विविध योजनांची माहिती देऊन गरजूंना थेट लाभ मिळवून देण्यात आला.

मान्यवरांची उपस्थिती आणि प्रशासनाचे प्रयत्न

या यशस्वी सोहळ्याला महापौर कविता मुळे, आमदार बालाजी कल्याणकर, जिल्हाधिकारी राहुल कर्डीले, डॉ. शंकरराव चव्हाण शासकीय वैद्यकीय महाविद्यालयाचे अधिष्ठाता डॉ. सुधीर देशमुख यांच्यासह विविध विभागांचे वरिष्ठ अधिकारी, कर्मचारी व हजारो नागरिक उपस्थित होते. कार्यक्रमाचे प्रभावी सूत्रसंचालन मुरलीधर हंबर्डे यांनी केले.
हे शिबिर यशस्वी करण्यासाठी उपविभागीय अधिकारी डॉ. सचिन खल्लाळ, तहसीलदार संजय वारकड, नायब तहसीलदार स्वप्निल दिगलवार, संजय नागमवाड, सुनील माचेवाड यांच्यासह महसूल, पंचायत, कृषी, आरोग्य विभागातील अधिकारी-कर्मचारी, ग्राम महसूल अधिकारी, ग्रामसेवक, कृषी सहाय्यक आणि नांदेड तहसील कार्यालयातील सर्व कर्मचाऱ्यांनी विशेष परिश्रम घेतले.
शासकीय योजनांची माहिती तळागाळातील नागरिकांपर्यंत पोहोचवणे, त्यांच्या प्रलंबित समस्या तात्काळ सोडवणे आणि प्रशासनावरील जनतेचा विश्वास अधिक दृढ करणे या उद्दिष्टात हे अभियान पूर्णपणे यशस्वी ठरले आहे.