नांदेड, दि. ४ जानेवारी २०२६ (प्रतिनिधी) माधव वाघमारे
अवैध गौण खनिज (वाळू) उत्खनन व वाहतुकीविरोधात नांदेड ग्रामीण पोलिसांनी मोठी आणि निर्णायक कारवाई करत १९ हायवा वाहने जप्त केली असून ३८ आरोपींविरुद्ध गुन्हे दाखल करण्यात आले आहेत. या कारवाईत एकूण ११, कोटी २ लाख ९५,००० रुपये किमतीचा मुद्देमाल जप्त करण्यात आला आहे.
नांदेड ग्रामीण पोलीस ठाण्याच्या हद्दीत दिनांक ३ जानेवारी २०२६ रोजी रात्री सुमारे १० वाजण्याच्या सुमारास गुप्त माहितीच्या आधारे सापळा रचून ही कारवाई करण्यात आली. असर्जन नाका ते भगतसिंग चौकडे जाणाऱ्या मार्गावर नाकाबंदी करून संशयास्पद वाहने तपासली असता विनारॉयल्टी मोठ्या प्रमाणावर वाळू वाहतूक होत असल्याचे उघडकीस आले.
या प्रकरणी गुन्हा क्रमांक ०८/२०२६ अन्वये भारतीय दंड संहिता कलम ३०३(२), १२५, ३(५) तसेच महाराष्ट्र जमीन महसूल संहिता कलम ४८(७)(८) व पर्यावरण संरक्षण अधिनियम १९८६ अंतर्गत गुन्हे दाखल करण्यात आले आहेत.
जप्त करण्यात आलेल्या १९ हायवांपैकी विविध कंपन्यांची वाहने असून प्रत्येकी अंदाजे ५८ लाख रुपये किमतीची वाहने व त्यामधील वाळूचा समावेश आहे. वाहून नेण्यात येणाऱ्या वाळूचे प्रमाण व बाजारभाव लक्षात घेता एकूण जप्त मुद्देमालाची किंमत ११ कोटी २ लाख ९५ हजार रुपये इतकी असल्याचे पोलिसांनी सांगितले.
ही संपूर्ण कारवाई पोलीस अधीक्षक श्री. अबिनाश कुमार यांच्या मार्गदर्शनाखाली, अपर पोलीस अधीक्षक श्रीमती अर्चना पाटील, अपर पोलीस अधीक्षक श्री. सुरज गुरव, उपविभागीय पोलीस अधिकारी श्री. प्रशांत शिंदे यांच्या नेतृत्वाखाली करण्यात आली. नांदेड ग्रामीण पोलीस ठाण्याचे पोलीस निरीक्षक ओमकांत चिंचोलकर, अधिकारी व अंमलदारांनी कारवाईत सक्रिय सहभाग घेतला.
पोलीस अधीक्षक अबिनाश कुमार यांनी अवैध वाळू उत्खनन व वाहतुकीविरोधात कठोर भूमिका कायम राहणार असून नियमांचे उल्लंघन करणाऱ्यांवर पुढेही अशीच कठोर कारवाई केली जाईल, असा स्पष्ट इशारा दिला आहे. अवैध व्यवसायांवर अंकुश ठेवण्यासाठी पोलिस प्रशासन सज्ज असल्याचेही त्यांनी नमूद केले.
