नांदेड २२ मे प्रतिनिधी
खुनाच्या गंभीर गुन्ह्यात गेल्या सात वर्षांपासून न्यायालयाच्या अजामीनपात्र वॉरंट (NBW) मधून हुलकावणी देणाऱ्या एका अट्टल फरार आरोपीला अटक करण्यात नांदेड स्थानिक गुन्हे शाखेला (LCB) यश आले आहे. ‘ऑपरेशन फ्लश आऊट’ अंतर्गत आसना पुलाखाली सापळा रचून ही धडक कारवाई करण्यात आली.
लातूर जिल्ह्यातील खुनाचा गुन्हा
मिळालेल्या माहितीनुसार, लातूर जिल्ह्यातील जळकोट पोलीस ठाण्याच्या हद्दीत २०१७ मध्ये खुनाचा एक गंभीर गुन्हा दाखल झाला होता. याप्रकरणी सत्र न्यायालय उदगीर येथे ‘सेशन केस क्र. ३०/२०१७’ अन्वये भादंवि कलम ३०२, २०१, १२०(ब), ३४१, ३६३, ३४ नुसार खटला प्रलंबित आहे. या गुन्ह्यातील आरोपी रवि रमेश हाडसे (वय ३४ वर्षे, रा. त्रिरत्न नगर, सांगवी, नांदेड) हा न्यायालयीन प्रक्रियेत गैरहजर राहून सातत्याने फरार होता. त्यामुळे न्यायालयाने त्याच्याविरुद्ध अजामीनपात्र वॉरंट (Non-Bailable Warrant) बजावले होते.
‘ऑपरेशन फ्लश आऊट’ अंतर्गत रचला सापळा
नांदेड जिल्ह्यातील गुन्हेगारीला आळा घालण्यासाठी आणि पाहिजे असलेल्या फरार आरोपींचा शोध घेण्यासाठी पोलीस अधीक्षक मा. श्री. अबिनाश कुमार यांनी ‘ऑपरेशन फ्लश आऊट’ मोहीम हाती घेतली आहे. या मोहिमेत स्थानिक गुन्हे शाखेचे पोलीस निरीक्षक श्री. अतुल भोसले यांना फरार आरोपींचा माग काढण्याचे आदेश देण्यात आले होते.
त्यानुसार पोलीस उपनिरीक्षक मिलिंद सोनकांबळे व त्यांच्या पथकाने गोपनीय माहिती गोळा केली. आज, दिनांक २२ मे २०२६ रोजी आरोपी रवि रमेश हाडसे हा नांदेड येथील आसना पुलाच्या खाली असल्याची खात्रीशीर माहिती पथकाला मिळाली.
आसना पुलाखाली आवळल्या आवळल्या बेड्या
माहिती मिळताच एलसीबीच्या पथकाने आसना ब्रिज परिसरात अत्यंत गुप्ततेने आणि शिताफीने सापळा लावला. पोलिसांची चाहूल लागताच पळून जाण्याच्या प्रयत्नात असलेल्या आरोपी रवि हाडसे याला पथकाने घेराव घालून ताब्यात घेतले. कायदेशीर सोपस्कार पूर्ण केल्यानंतर आरोपीला पुढील कारवाईसाठी जळकोट पोलीस ठाणे (जिल्हा लातूर) यांच्या स्वाधीन करण्यात आले आहे.
वरिष्ठांचे मार्गदर्शन व कौतुक
ही उल्लेखनीय कामगिरी नांदेडचे पोलीस अधीक्षक मा. श्री. अबिनाश कुमार, अपर पोलीस अधीक्षक (भोकर) मा. श्रीमती अर्चना पाटील, आणि अपर पोलीस अधीक्षक (नांदेड) मा. श्री. सुरज गुरव यांच्या मार्गदर्शनाखाली पार पडली.
तसेच स्थानिक गुन्हे शाखेचे पोलीस निरीक्षक श्री. अतुल भोसले, पोउपनि मिलिंद सोनकांबळे, आणि त्यांच्या पथकातील अंमलदार पोहेकॉ/रविशंकर बामणे, पोकॉ/चंद्रकांत स्वामी, पोकॉ/अनिल बिरादार व पोकॉ/अझरोद्दीन शेख यांनी या कारवाईत मोलाची भूमिका बजावली. या उत्कृष्ट कामगिरीबद्दल पोलीस अधीक्षकांनी संपूर्ण टीमचे जाहीर कौतुक केले आहे.
– वृत्त प्रतिनिधी माधव वाघमारे नांदेड.
