नांदेड १५ मे (प्रतिनिधी: माधव वाघमारे)
नांदेड शहरात दहशत निर्माण करून खंडणी मागणाऱ्या आणि जबरी चोरी करणाऱ्या टोळीतील दोन सराईत आरोपींना अटक करण्यात स्थानिक गुन्हे शाखेला (LCB) यश आले आहे. भाग्यनगर पोलीस ठाण्याच्या हद्दीत घडलेल्या गंभीर गुन्ह्यातील हे दोन्ही आरोपी गेल्या काही दिवसांपासून फरार होते.
नेमकी घटना काय?
दिनांक ८ मे २०२६ रोजी फिर्यादी आदित्य देवानंद मड्रेवार (रा. भविष्य नगर, नांदेड) यांना आरोपी ऋषी सोनकांबळे, साई आणि त्यांच्या इतर साथीदारांनी अडवले होते. आरोपींनी संगनमत करून फिर्यादीला अश्लील शिवीगाळ करत कुऱ्हाडीच्या तुंब्याने आणि लाथाबुक्क्यांनी बेदम मारहाण केली. या हल्ल्यात फिर्यादी गंभीर जखमी झाले होते.
इतक्यावरच न थांबता आरोपींनी फिर्यादीच्या हातातील चांदीच्या दोन अंगठ्या, कानातील बाली आणि सॅमसंग कंपनीचा मोबाईल असा एकूण २२,००० रुपयांचा मुद्देमाल बळजबरीने हिसकावून घेतला. तसेच, “पैसे न दिल्यास जीवे मारून टाकू,” अशी धमकी देऊन खंडणीची मागणी केली होती. याप्रकरणी भाग्यनगर पोलीस ठाण्यात गुन्हा रजिस्टर क्रमांक २५५/२०२६ नुसार भारतीय न्याय संहितेच्या विविध कलमान्वये गुन्हा दाखल करण्यात आला होता.
अशी झाली अटक
सदर गुन्ह्यातील गांभीर्य ओळखून नांदेडचे पोलीस अधीक्षक अबिनाश कुमार यांनी फरार आरोपींचा शोध घेण्याचे आदेश स्थानिक गुन्हे शाखेला दिले होते. या सूचनांनुसार गुन्हे शाखेचे पोलीस निरीक्षक अतुल भोसले यांच्या मार्गदर्शनाखाली सहाय्यक पोलीस निरीक्षक विठ्ठल घोगरे आणि त्यांच्या पथकाने गोपनीय माहिती गोळा केली.
मिळालेल्या माहितीच्या आधारे पोलिसांनी सापळा लावून खालील दोन आरोपींना ताब्यात घेतले:
१) साईनाथ बालाजी परकेवाड (वय १९ वर्षे, रा. सिडको, नांदेड) – याला रेल्वे स्टेशन परिसरातून ताब्यात घेण्यात आले.
२) सचिन रमेश जिंकलवाड (वय २० वर्षे, रा. असदवन, नांदेड) – याला चुंगी नाका ब्रिज खालून ताब्यात घेण्यात आले.
पोलीस पथकाचे कौतुक
ही यशस्वी कारवाई पोलीस अधीक्षक अबिलनाश कुमार, अपर पोलीस अधीक्षक श्रीमती अर्चना पाटील (भोकर) आणि अपर पोलीस अधीक्षक सुरज गुरव यांच्या मार्गदर्शनाखाली पार पडली. या कारवाईत स्थानिक गुन्हे शाखेचे अंमलदार गोविंद राठोड, साहेबराव कदम, विठ्ठल वैद्य, अकबर पठाण तसेच सायबर सेलचे राजू सिटीकर, दिपक ओढणे, महेश बडगु आणि रेश्मा पठाण यांनी महत्त्वपूर्ण भूमिका बजावली.
अटक करण्यात आलेल्या दोन्ही आरोपींना पुढील कायदेशीर कारवाईसाठी भाग्यनगर पोलिसांच्या ताब्यात देण्यात आले आहे. गुन्हेगारांवर करण्यात आलेल्या या धडक कारवाईमुळे नांदेड पोलीस दलाचे सर्वत्र कौतुक होत आहे.
