मोक्का अंतर्गत फरार असलेला आरोपी स्थानिक गुन्हे शाखेच्या जाळ्यात एलसीबीची धडक कारवाई

नांदेड ५ जून प्रतिनिधी
नांदेड येथील विमानतळ पोलीस ठाण्याच्या हद्दीतील महाराष्ट्र संघटीत गुन्हेगारी अधिनियम १९९९ (MCOCA) च्या गंभीर गुन्ह्यातील बऱ्याच दिवसांपासून पाहिजे असलेला आणि फरार आरोपी अखेर स्थानिक गुन्हे शाखेच्या (LCB) जाळ्यात अडकला आहे. स्थानिक गुन्हे शाखेच्या पथकाने सापळा रचून या अट्टल गुन्हेगाराला ताब्यात घेतले असून, पुढील कारवाईसाठी त्याला विमानतळ पोलिसांच्या स्वाधीन करण्यात आले आहे.

ऑपरेशन फ्लॅश आऊट अंतर्गत कारवाई

नांदेड जिल्ह्यातील विविध पोलीस स्टेशन अंतर्गत दाखल गुन्ह्यातील पाहिजे व फरार आरोपींचा शोध घेऊन त्यांच्यावर कडक कारवाई करण्याचे आदेश नांदेडचे पोलीस अधीक्षक मा.श्री. अबिनाश कुमार यांनी दिले आहेत. या ‘ऑपरेशन फ्लॅश आऊट’ अंतर्गत स्थानिक गुन्हे शाखेचे पोलीस निरीक्षक श्री. अतुल भोसले यांना निर्देशित करण्यात आले होते.

म्हाळजा माळटेकडी परिसरात रचला सापळा

दिनांक ०४/०६/२०२६ रोजी स्थानिक गुन्हे शाखेचे पोलीस उपनिरीक्षक मिलींद सोनकांबळे व त्यांचे पथकातील अंमलदार हद्दीत पेट्रोलिंग करत होते. दरम्यान, त्यांना गुप्त बातमीदाराकडून खात्रीशीर माहिती मिळाली की, विमानतळ पोलीस ठाण्यात नोंद असलेल्या मोक्का (MCOCA) गुन्ह्यातील फरार आरोपी सोहेल खाँन उर्फ चिंधी फेरोजखाँन पठाण (वय २५ वर्षे, व्यवसाय- बेकार, रा. बालाजीनगर हिंगोली नाका, नांदेड) हा सध्या ‘म्हाळजा माळटेकडी’ या भागात फिरत आहे.
माहिती मिळताच एलसीबीच्या पथकाने तात्काळ या परिसरात कसून शोध घेतला आणि सापळा रचून आरोपीला शिताफीने ताब्यात घेतले. त्याची कसून चौकशी केली असता, तो महाराष्ट्र संघटीत गुन्हेगारी अधिनियम १९९९ मधील फरार/पाहिजे असलेला आरोपी असल्याचे निष्पन्न झाले.

गुन्ह्याची पार्श्वभूमी व कलमे

पकडण्यात आलेल्या आरोपीवर विमानतळ पोलीस ठाण्यात गु.र.नं. १८४/२०२६ नुसार खालील कलमांखाली गुन्हा दाखल आहे:

• भारतीय न्याय संहिता (BNS) कलम: १०९, ३५२, ६१(२)(अ), ३(५)
• सह कलम: ३(१)(II), ३(२), ३(३), ३(४) (महाराष्ट्र संघटीत गुन्हेगारी अधिनियम सन १९९९ – मोक्का)

पोलीस अधीक्षकांकडून कौतुक

या अत्यंत गंभीर आणि संवेदनशील गुन्ह्यातील फरार आरोपीला जेरबंद करून उल्लेखनीय कामगिरी बजावल्याबद्दल नांदेडचे पोलीस अधीक्षक मा.श्री. अबिनाश कुमार, अपर पोलीस अधीक्षक (भोकर) मा.श्रीमती अर्चना पाटील, आणि अपर पोलीस अधीक्षक (नांदेड) मा.श्री. सुरज गुरव यांनी संपूर्ण पथकाचे विशेष कौतुक केले आहे.
कारवाई करणारे पोलीस पथक:
ही यशस्वी कामगिरी स्थानिक गुन्हे शाखेचे पोलीस निरीक्षक श्री. अतुल भोसले यांच्या मार्गदर्शनाखाली पोलीस उपनिरीक्षक मिलींद सोनकांबळे, पोहेकॉ रविशंकर बामणे, रितेश कुलथे, पोकॉ चंद्रकांत स्वामी, शेख अझरोद्दीन, अनिल बिरादार (सर्व स्था.गु.शा. नांदेड), तसेच सायबर सेल नांदेडचे राजेंद्र सिटीकर आणि दिपक ओढणे यांनी बजावली आहे.
वृत्त संकलन व संपादन
प्रतिनिधी: माधव वाघमारे