ऑपरेशन क्रॅकडाऊन २ गावठी पिस्तूल ५ जिवंत काडतुसांसह ३ आरोपी जेरबंद ६० हजारांचा मुद्देमाल जप्त

नांदेड ४ जून प्रतिनिधी
नांदेड जिल्ह्यातील गुन्हेगारीला आळा घालण्यासाठी आणि अवैध अग्नीशस्त्र बाळगणाऱ्या व पुरवठा करणाऱ्यांची साखळी उद्ध्वस्त करण्यासाठी पोलीस प्रशासनाने कंबर कसली आहे. पोलीस अधीक्षक मा.श्री. अविनाश कुमार यांच्या मार्गदर्शनाखाली स्थानिक गुन्हे शाखेने (LCB) ‘ऑपरेशन क्रॅकडाऊन’ अंतर्गत धडक कारवाई करत दोन लोखंडी गावठी पिस्तूल, पाच जिवंत व एक खाली काडतूस आणि पाच मॅगझीन असा एकूण ६० हजार रुपये किमतीचा मुद्देमाल जप्त केला आहे. या प्रकरणी तीन आरोपींना ताब्यात घेण्यात आले आहे.

गुप्त माहितीच्या आधारे राज मॉल पार्किंगमध्ये सापळा

दिनांक ०४.०६.२०२६ रोजी स्थानिक गुन्हे शाखेचे सपोनि विठ्ठल घोगरे व त्यांचे पथक पेट्रोलिंगवर असताना त्यांना एक महत्त्वाची गोपनीय माहिती मिळाली. राज मॉलच्या पार्किंगमध्ये एक इसम आपल्या बॅगमध्ये गावठी पिस्तूल विक्रीच्या उद्देशाने बाळगून असल्याची खात्रीशीर माहिती पथकाला मिळाली होती.
मिळालेल्या माहितीच्या आधारे पोलिसांनी तात्काळ राज मॉल नांदेडच्या पार्किंगमध्ये छापा टाकून कारवाई केली. यावेळी संशयास्पद रित्या आढळलेल्या एका इसमाला ताब्यात घेऊन त्याची व त्याच्याजवळील बॅगची झडती घेतली असता, पोलिसांचे धाबे दणाणले. त्याच्या बॅगेत विनापरवाना बेकायदेशीररित्या बाळगलेले दोन लोखंडी गावठी पिस्तूल (अग्नीशस्त्र), ५ जिवंत व १ खाली काडतूस आणि ५ मॅगझीन असा एकूण ६०,०००/- रुपयांचा मुद्देमाल आढळून आला. पोलिसांनी हा सर्व ऐवज जप्त केला आहे.

अटक करण्यात आलेले आरोपी

पोलिसांनी या कारवाईत खालील तीन आरोपींना अटक केली आहे:
१) गोपाळ उर्फ बिट्टू सुदर्शन चव्हाण (वय २१ वर्षे, व्यवसाय: शिक्षण, रा. नमस्कार चौक, नांदेड) – याला घटनास्थळावरून मुद्देमालासह रंगेहात पकडण्यात आले.
२) साईसिंग उर्फ साईलाला दिपकसिंग गहेरवार (रा. बालाजी मंदिर कमानजवळ, सिडको, नांदेड) – याने मुख्य आरोपीला पिस्तूल पुरवल्याचे तपासात समोर आले आहे.
३) शेख शाहरूख उर्फ कबुतर शेख अजगर (रा. खुदबेनगर चौरस्ता, नांदेड) – याचाही या गुन्ह्यात थेट सहभाग असल्याचे निष्पन्न झाले आहे.

अशी उघडकीस आली साखळी

मुख्य आरोपी गोपाळ उर्फ बिट्टू चव्हाण याला ताब्यात घेऊन पोलिसांनी कसून चौकशी केली असता, त्याने हे अग्नीशस्त्र आणि काडतुसे साईसिंग उर्फ साईलाला दिपकसिंग गहेरवार (रा. नमस्कार चौक, नांदेड) व शेख शाहरूख उर्फ कबुतर शेख अजगर (रा. खुदबेनगर चौरस्ता, नांदेड) यांच्याकडून विकत घेतल्याची कबुली दिली. पोलिसांनी तात्काळ कारवाई करत या साखळीचा पर्दाफाश केला आणि आरोपींना मुद्देमालासह विमानतळ पोलीस ठाणे, नांदेड येथे हजर करून गुन्हा नोंद केला आहे (गु.र.नं. २५८/२०२६, कलम ३/२५, ७/२५ भा.ह.का.).

या अधिकाऱ्यांच्या पथकाने केली कामगिरी

ही यशस्वी कारवाई पोलीस अधीक्षक मा.श्री. अबिनाश कुमार, अपर पोलीस अधीक्षक (भोकर) मा.श्रीमती अर्चना पाटील, आणि अपर पोलीस अधीक्षक (नांदेड) मा.श्री. सुरज गुरव यांच्या मार्गदर्शनाखाली स्थानिक गुन्हे शाखेचे पोलीस निरीक्षक श्री. अतुल भोसले, सपोनि विठ्ठल घोगरे आणि एलसीबी नांदेडच्या पथकातील अंमलदार पोकॉ/ राजीव बोधगिरे, पोकॉ/ गोविंद राठोड, पोकॉ/ विठ्ठल वैद्य, पोकॉ/ साहेबराव कदम, पोकॉ/ गणेश यादव (खंडणी विरोधी पथक), चापोकॉ/ अकबर पठाण यांनी केली आहे.
स्थानिक गुन्हे शाखेच्या या उत्कृष्ट आणि धडाकेबाज कामगिरीबद्दल पोलीस अधीक्षक साहेबांनी संपूर्ण पथकाचे विशेष कौतुक केले आहे.
विशेष वृत्त प्रतिनिधी: माधव वाघमारे, नांदेड.