धडक कारवाई नांदेडमध्ये तिरट जुगार अड्ड्यावर पोलिसांचा छापा ५ लाखांच्या मुद्देमालासह ८ जुगारी गजाआड

नांदेड १४ जुलै प्रतिनिधी
जिल्ह्यात अवैध धंद्यांविरोधात सुरू असलेल्या विशेष मोहिमेत नांदेड ग्रामीण पोलिसांना मोठे यश आले आहे. मौजे वांगी गावाच्या परिसरात सुरू असलेल्या एका जुगार अड्ड्यावर अचानक छापा टाकून पोलिसांनी ८ जणांना रंगेहात पकडले असून, त्यांच्याकडून ५ लाख ४ हजार ९५० रुपयांचा मुद्देमाल जप्त केला आहे. ही धडक कारवाई पोलीस अधीक्षक डॉ. नीलाभ रोहन यांच्या मार्गदर्शनाखाली करण्यात आली आहे.

गोपनीय माहितीवरून पोलिसांचा सापळा

१३ जुलै २०२६ रोजी नांदेड ग्रामीण पोलीस ठाण्याचे अधिकारी व अंमलदार परिसरात अवैध धंद्यांचे समूळ उच्चाटन करण्यासाठी पेट्रोलिंग करत होते. दरम्यान, मौजे वांगी गावाजवळील रोडच्या पश्चिमेस असलेल्या एका मोकळ्या जागेत काही इसम पैशांची हार-जीत लावून ‘तिरट’ नावाचा जुगार खेळत असल्याची खात्रीशीर गोपनीय माहिती पोलिसांना मिळाली.
माहिती मिळताच पोलीस पथकाने पंचांसह घटनास्थळी अचानक छापा टाकला. पोलिसांची चाहूल लागताच जुगाराच्या अड्ड्यावरून काही जणांनी पळून जाण्याचा प्रयत्न केला, मात्र सतर्क पोलिसांनी पाठलाग करून ८ जणांना जागीच ताब्यात घेतले.

अटक करण्यात आलेल्या आरोपींची नावे:

१. अश्पाक अब्दुल रज्जाक कुरेशी (रा. चौफाळा, नांदेड)
२. रियाज अब्दुल रहमान कुरेशी (रा. चौफाळा, नांदेड)
३. अब्दुल रहमान अब्दुल जब्बार कुरेशी (रा. चौफाळा, नांदेड)
४. जाफर कुरेशी (रा. वाजेगाव, नांदेड)
५. अब्दुल कलाम पठाण (रा. नुरी चौक, नांदेड)
६. रशीद गणी कुरेशी (रा. मदिना नगर, नांदेड)
७. गंगाधर (रा. वांगी)
८. समीर पठाण (रा. मदिना नगर, नांदेड)

लाखो रुपयांचा मुद्देमाल जप्त

पकडण्यात आलेल्या आरोपींची अंगझडती आणि घटनास्थळाची पाहणी केली असता, पोलिसांना खालील मुद्देमाल मिळून आला:

• रोख रक्कम: ४,९५० रुपये
• मोबाईल फोन्स: ४०,००० रुपये किमतीचे दोन मोबाईल
• वाहने: ४,६०,००० रुपये किमतीच्या पाच मोटरसायकली
• एकूण जप्त मुद्देमाल: ५,०४,९५० रुपये (पाच लाख चार हजार नऊशे पन्नास रुपये)
  या प्रकरणी नांदेड ग्रामीण पोलीस ठाण्यात गुन्हा रजिस्टर क्रमांक ८६६/२०२६, कलम १२(अ) जुगार अधिनियम अन्वये गुन्हा दाखल करण्यात आला असून पुढील तपास पोलीस करत आहेत.

कारवाई करणारे पोलीस पथक

पोलीस अधीक्षक मा. श्री. डॉ. नीलाभ रोहन यांच्या मार्गदर्शनाखाली ही उल्लेखनीय कारवाई नांदेड ग्रामीणचे पोलीस निरीक्षक श्री. ओमकांत चिंचोलकर, पोलीस उपनिरीक्षक श्री. व्यंकट कुसमे, तसेच पोलीस अंमलदार संतोष पवार, भिसे, शेख गफार, टिप रसे आणि कल्याणकर यांच्या पथकाने यशस्वीरीत्या पार पाडली.

पोलीस प्रशासनाचे आवाहन:
जिल्ह्यात मटका, जुगार, दारू, अमली पदार्थ अशा कोणत्याही बेकायदेशीर धंद्यांची माहिती मिळाल्यास नागरिकांनी तात्काळ जवळच्या पोलीस ठाण्याशी किंवा नियंत्रण कक्ष, नांदेड येथे संपर्क साधून सहकार्य करावे, असे आवाहन पोलीस अधीक्षक कार्यालयाचे जनसंपर्क अधिकारी आशिष सखाराम बोराटे यांनी केले आहे.

बातमी प्रतिनिधी: माधव वाघमारे