अवैध पिस्तुल व जिवंत काडतुसांसह मुख्य डीलरला ठोकल्या बेड्या

नांदेड ३० मार्च प्रतिनिधी माधव वाघमारे
जिल्ह्यात अवैध अग्नीशस्त्रांविरुद्ध सुरू असलेल्या विशेष मोहिमेअंतर्गत नांदेड ग्रामीण पोलिसांनी मोठी कामगिरी केली आहे. गोपाळचावडी परिसरात सापळा रचून पोलिसांनी एका मुख्य डीलरसह एकूण तीन आरोपींना ताब्यात घेतले असून, त्यांच्याकडून ३१,००० रुपये किमतीचे गावठी पिस्तुल आणि दोन जिवंत काडतुसे जप्त केली आहेत.
नेमकी घटना काय?
पोलीस अधीक्षक अबिनाश कुमार यांनी जिल्ह्यामध्ये ऑपरेशन फ्लॅश आऊट’ अंतर्गत अवैध शस्त्र बाळगणाऱ्यांविरुद्ध कडक मोहीम राबवण्याचे आदेश दिले होते. याच मोहिमेदरम्यान, ३० मार्च २०२६ रोजी पहाटेच्या सुमारास नांदेड ग्रामीण पोलिसांना गोपाळचावडी येथील पाण्याच्या टाकीजवळ काही तरुण संशयास्पद रित्या फिरत असल्याची गोपनीय माहिती मिळाली.
या माहितीच्या आधारे पोलिसांनी तातडीने घटनास्थळी सापळा रचला. संशयित आरोपींची अंगझडती घेतली असता, त्यांच्याकडे एक सिल्व्हर रंगाचे मॅगझिनसह गावठी पिस्तुल आणि दोन जिवंत काडतुसे मिळून आली. पोलिसांनी हा सर्व मुद्देमाल जागीच जप्त केला.
अटक करण्यात आलेले आरोपी:
१. खुद्बोद्दीन अनवर काझी (वय २७ वर्षे, रा. मोमीनपुरा, इतवारा)
२. अब्दुल अहद परवेज अली खान (वय २४ वर्षे, रा. इकबालनगर, नांदेड)
३. मोहम्मद खाजा मोहम्मद मिरा (वय २१ वर्षे, रा. इकबालनगर, नांदेड)
४. शेख आदिल शेख शकील (पिस्तुल विक्रेता)
५. आनंद ऊर्फ चिन्नू सरदार यादव (काडतूस विक्रेता – अद्याप फरार)
गुन्हेगारी पार्श्वभूमी:
पोलिसांनी दिलेल्या माहितीनुसार, अटक करण्यात आलेल्या आरोपींविरुद्ध यापूर्वीदेखील खून, अपहरण, विनयभंग, चोरी, जबरी चोरी आणि प्राणघातक हल्ला यांसारखे अनेक गंभीर गुन्हे दाखल आहेत. या कारवाईमुळे अवैध शस्त्र विक्री करणाऱ्या टोळीचे धाबे दणाणले आहेत.
यांनी केली कारवाई
ही कारवाई पोलीस अधीक्षक अबिनाश कुमार, अप्पर पोलीस अधीक्षक श्रीमती अर्चना पाटील, अप्पर पोलीस अधीक्षक सूरज गुरव, आणि उपविभागीय पोलीस अधिकारी प्रशांत शिंदे यांच्या मार्गदर्शनाखाली पार पडली. यामध्ये पोलीस निरीक्षक ओमकांत चिंचोलकर, पोउपनि व्यंकट कुसमे, स्वप्नील साळुंखे, मारोती पंचालिंग, शंकर माळगे, समीर अहमद, सचिन चावरे आणि सायबर विभागाचे पथक सहभागी होते.
या यशस्वी कामगिरीबद्दल पोलीस अधीक्षकांनी सर्व अधिकारी व अंमलदारांचे कौतुक केले आहे. या प्रकरणाचा पुढील तपास मपोनि काळे करत आहेत.