नांदेड | ३० मार्च प्रतिनिधी: माधव वाघमारे
स्वामी रामानंद तीर्थ मराठवाडा विद्यापीठाच्या क्रीडा विभागातर्फे यावर्षीच्या पश्चिम विभागीय आंतर विद्यापीठ खो-खो (मुले) स्पर्धेचे यजमानपद भूषविण्यात येत आहे. येत्या २ ते ६ एप्रिल २०२६ दरम्यान होणाऱ्या या भव्य क्रीडा सोहळ्यासाठी विद्यापीठ प्रशासन सज्ज झाले असून, पाच राज्यांतील ७४ संघांच्या आगमनाने विद्यापीठ परिसर गजबजणार आहे.
दिग्गजांच्या उपस्थितीत रंगणार उद्घाटन सोहळा
या आंतरराज्य स्पर्धेचे दिमाखदार उद्घाटन महाराष्ट्र राज्याचे उच्च व तंत्रशिक्षण राज्यमंत्री मा. श्री. इंद्रनील नाईक यांच्या शुभहस्ते संपन्न होणार आहे. कार्यक्रमाच्या अध्यक्षस्थानी विद्यापीठाचे कुलगुरू मा. डॉ. मनोहर चासकर यांची प्रमुख उपस्थिती असेल.
यावेळी विशेष आकर्षण म्हणून भारतीय खो-खो संघाचे कर्णधार आणि आंतरराष्ट्रीय कीर्तीचे खेळाडू प्रतीक वाईकर यांची उपस्थिती खेळाडूंना प्रेरणा देणारी ठरेल. कार्यक्रमाला प्र-कुलगुरू डॉ. अशोक महाजन, कुलसचिव डॉ. ज्ञानेश्वर पवार, क्रीडा संचालक डॉ. भास्कर माने यांच्यासह व्यवस्थापन परिषद व सिनेट सदस्य मोठ्या संख्येने उपस्थित राहणार आहेत.
पाच राज्यांचे ७४ संघ भिडणार
या स्पर्धेत पश्चिम विभागातील खालील राज्यांचे प्रतिनिधीत्व करणारे संघ सहभागी होत आहेत:
- महाराष्ट्र
- गोवा
- गुजरात
- मध्य प्रदेश
- राजस्थान
एकूण ७४ संघ ‘बाद’ (Knock-out) आणि ‘साखळी’ (League) पद्धतीने आपले कौशल्य पणाला लावतील.
दिवस-रात्र सामने आणि अत्याधुनिक तयारी
स्पर्धेचे गांभीर्य आणि व्याप्ती लक्षात घेता विद्यापीठ परिसरात चार सुसज्ज क्रीडांगणांची निर्मिती करण्यात आली आहे. हे सामने केवळ दिवसाच नव्हे, तर प्रकाशझोतात (Day-Night) खेळवले जाणार असल्याने क्रीडाप्रेमींसाठी ही एक पर्वणीच ठरेल.
“खेळाडूंना राष्ट्रीय स्तरावर स्वतःचे कौशल्य सिद्ध करण्यासाठी हे एक उत्तम व्यासपीठ आहे. आम्ही आयोजनाची सर्व तयारी पूर्ण केली असून, खेळाडूंच्या राहण्याची व निवासाची उत्तम सोय केली आहे
आयोजन समिती, स्वारातीम विद्यापीठ
