सोनाई नगर येथील कुंटणखान्यावर नांदेड पोलिसांचा छापा तीन पीडित महिलांची सुटका सहा आरोपीविरुद्ध गुन्हा दाखल

नांदेड दिनांक ३० ऑक्टोबर  (प्रतिनिधी माधव वाघमारे)

नांदेड शहरातील अनैतिक मानवी व्यापारास आळा घालण्यासाठी पोलीस अधीक्षक मा. डॉ. नीलाभ रोहन यांच्या आदेशानुसार विशेष मोहीम राबविण्यात येत आहे. त्याअनुषंगाने गुन्हे शाखा, नांदेड अंतर्गत असलेल्या अनैतिक मानवी वाहतूक प्रतिबंधक कक्षाने (AHTU) २९ ऑक्टोबर २०२६ रोजी मोठी कारवाई करत शिवसाई अपार्टमेंट, सोनाई नगर, नांदेड येथे छुप्या मार्गाने चालवल्या जाणाऱ्या कुंटणखान्याचा (वेश्या व्यवसाय) पर्दाफाश केला आहे.

‘बोगस गिऱ्हाईक’ पाठवून लावला छापा: पोलिसांना मिळालेल्या खत्रीशीर माहितीनुसार, शिवसाई अपार्टमेंट, सोनाई नगर येथे पीडित महिलांना पैशाचे आमिष दाखवून त्यांच्याकडून बळजबरीने वेश्या व्यवसाय करून घेतला जात होता. या माहितीच्या आधारे स्थानिक गुन्हे शाखेच्या मार्गदर्शनाखाली एक विशेष पथक तयार करण्यात आले. माहितीची खातरजमा करण्यासाठी पोलिसांनी शासकीय पंचसमक्ष एका सामाजिक कार्यकर्त्याला “बोगस गिऱ्हाईक” म्हणून त्याठिकाणी पाठवले. बोगस गिऱ्हाईकाने तिथे जाऊन वेश्यागमनासाठी इसम निश्चित करताच पोलिसांनी ठरल्याप्रमाणे इशारा केला आणि छापा टाकला.

सहा आरोपी निष्पन्न व तीन महिलांची सुटका: घटनास्थळावर खालील सहा आरोपी मिळून आले:

• रणजितकौर अजय तिवारी (वय ५०, रा. सोनाईनगर, नांदेड)
• धरमसिंग महीद्रसिंग अलग (वय ३१, रा. सोनाई नगर, नांदेड)
• दत्ता हरी उमरे (वय ४०, रा. विद्युतनगर, नांदेड)
• अशिष साहेबराव किर्तणे (वय २५, रा. सर्वोदय नगर, नांदेड)
• मनोज नामदेव सुर्यवंशी (वय २२, रा. चैतन्य नगर, नांदेड)
• महेश राजु वाघमारे (वय २५, रा. चिखलवाडी, नांदेड)

सदर कारवाईदरम्यान कुंटणखान्यातून एकूण तीन पीडित महिलांची सुटका करण्यात आली असून, आरोपी या महिलांना पैशाचे आमिष दाखवून बळजबरीने हा व्यवसाय करून घेत होते. घटनास्थळावरून वेश्यागमनासाठी वापरण्यात येणारे साहित्य, रोख रक्कम आणि मोबाईल फोन असा एकूण ३४,३६० रुपये किमतीचा मुद्देमाल पंचसमक्ष जप्त करण्यात आला आहे.

पोलिसांत गुन्हा दाखल: या प्रकरणी वरील नमूद आरोपीविरुद्ध पोलीस ठाणे भाग्यनगर येथे गु.र.नं. ६२६/२०२६ कलम ४, ५, ६, ७ अनैतिक मानवी व्यापार प्रतिबंध अधिनियम (ITPA) सह कलम १४३, ३(५) भान्यासं-२०२३ कायद्याप्रमाणे गुन्हा दाखल करण्यात आला आहे.

ही यशस्वी कारवाई पोलीस अधीक्षक मा. डॉ. नीलाभ रोहन, अपर पोलीस अधीक्षक मा. सुरज गुरव, उपविभागीय पोलीस अधिकारी रामेश्वर वंजने यांच्या मार्गदर्शनखाली पोनि/अतुळ भोसले (स्थागुशा नांदेड), पोनि/संतोष तांबे (भाग्यनगर) व पोलीस अंमलदार ज्ञानोबा कवठेकर रितेश कुलथे गणेश लोसरवाड पो नि अश्विनी गायकवाड अच्युत मोरे यशोदा केंद्रे दीपा कवठेकर आणि (AHTU) पथकातील अधिकारी-कर्मचाऱ्यांनी पार पाडली आहे.