प्रतिनिधी ५ सप्टेंबर| माधव वाघमारे
नांदेड: जिह्यात अवैध गौण खनिज उत्खनन व वाहतुकीस प्रतिबंध घालण्यासाठी पोलीस अधीक्षक मा. डॉ. नीलाभ रोहन यांच्या आदेशाने विशेष मोहीम राबवली जात आहे. या मोहिमेअंतर्गत नांदेड ग्रामीण पोलिसांनी पिंपळगाव व भनगी शिवारातील गोदावरी नदी पात्रातून अवैध वाळू उपसा करणाऱ्यांवर मोठी धडक कारवाई केली असून, तब्बल २ कोटी १६ लाख १० हजार रुपये किमतीचा मुद्देमाल जप्त व नष्ट केला आहे.
रात्रगस्तीदरम्यान रचला सापळा दिनांक ४ सप्टेंबर २०२६ रोजी नांदेड ग्रामीण पोलीस ठाण्याच्या गुन्हे शोध पथकाने पिंपळगाव ते वाडीपाटी रस्त्यावर सापळा रचून अवैध वाळू वाहतूक करणारे दोन हायवा ट्रक जप्त केले. यामध्ये टाटा हायवा (MH-26-CH-7086) आणि भारत बेंझ हायवा (MH-26-CH-2409) यांचा समावेश असून, प्रत्येकी ५ ब्रास रेतीसह एकूण ९० लाख ५० हजार रुपयांचा मुद्देमाल जप्त करण्यात आला.
रेती धक्क्यांवर छापा; पात्रात उड्या मारून माफिया फरार हायवा चालकांच्या चौकशीनंतर पोलिसांनी तातडीने पिंपळगाव व भनगी येथील गोदावरी नदी पात्रातील रेती धक्क्यांवर धाड टाकली. पोलिसांना पाहताच वाळू उपसा करणारे इसम नदीच्या पाण्यात उड्या मारून पसार झाले.
घटनास्थळावरून जप्त व नष्ट केलेला मुद्देमाल:
- फायबर बोटी (७): ४ मोठ्या फायबर बोटी (किंमत ₹८० लाख) व ३ लहान फायबर बोटी (किंमत ₹२१ लाख) – जागीच नष्ट.
- वाळू उपसा इंजिन (३): किंमत ₹९ लाख – जागीच नष्ट.
- तराफे व रेती: ३५ तराफे (किंमत ₹१७.५ लाख) व ७० ब्रास रेती (किंमत ₹३.५ लाख) – नदीत उलटवून व जाळून जागीच नष्ट.
गुन्हा दाखल व आरोपींवर कारवाई या कारवाईत ज्ञानेश्वर खंडू कोपनर (वय २१, रा. पांगरी), पिराजी रामदास आव्हाड (वय २२, रा. पेनूर), रेती धक्का मालक/चालक नारायण नरहरी पुंड व अर्जुन जगन्नाथ येवले यांच्यासह इतर ९ अनोळखी फरार इसमांवर नांदेड ग्रामीण पोलीस ठाण्यात गुन्हा क्र. ११२८/२०२६ (कलम ३०३(२), ३(५) BNS सह ४८(७), ४८(८) महाराष्ट्र जमीन महसूल संहिता) अन्वये गुन्हा दाखल करण्यात आला आहे.
कारवाई करणारे पथक ही उल्लेखनीय कारवाई पोलीस अधीक्षक डॉ. नीलाभ रोहन यांच्या मार्गदर्शनाखाली पोनि. ओमकांत चिंचोलकर, पोउपनि. व्यंकट कुसमे, आणि पोलीस अंमलदार जिवन तेलंग, भगवान टिपसरे, भिसे, गफार शेख, कल्याणकर व पवार यांनी पार पाडली.
अवैध वाळू उत्खननामुळे पर्यावरणाचे मोठे नुकसान होत असून, नागरिकांनी अशा प्रकारच्या बेकायदेशीर हालचाली आढळल्यास त्वरित जवळच्या पोलीस ठाण्यात किंवा पोलीस नियंत्रण कक्षास माहिती द्यावी, असे आवाहन पोलीस प्रशासनातर्फे करण्यात आले आहे.
