नांदेड ६ एप्रिल प्रतिनिधी
सोशल मीडियाच्या माध्यमातून शस्त्रांचे प्रदर्शन करून दहशत निर्माण करणाऱ्या गुन्हेगारांविरुद्ध नांदेड पोलिसांनी कंबर कसली आहे. इन्स्टाग्राम आयडीवर अवैध पिस्टल आणि जिवंत काडतुसांचे व्हिडिओ विक्रीच्या उद्देशाने पोस्ट करणाऱ्या दोन तरुणांवर नांदेड ग्रामीण पोलिसांनी धडक कारवाई केली असून, त्यांच्याकडून खंजर आणि मोबाईल जप्त करण्यात आला आहे.
नेमकी घटना काय?
नांदेडचे पोलीस अधीक्षक श्री. अबिनाश कुमार यांनी जिल्ह्यात ‘ऑपरेशन फ्लॅश आऊट’ अंतर्गत अवैध शस्त्र बाळगणाऱ्यांवर कारवाईचे आदेश दिले आहेत. शहरात अलीकडेच घडलेल्या गंभीर गुन्ह्यांच्या पार्श्वभूमीवर पोलीस सराईत गुन्हेगारांच्या सोशल मीडिया अकाऊंटवर नजर ठेवून होते. तपासादरम्यान, पोलिसांना एका इन्स्टाग्राम आयडीवरून पिस्टल आणि राऊंड विक्री करण्याच्या उद्देशाने व्हिडिओ पोस्ट केल्याचे तसेच समाजात दहशत निर्माण होईल असे मजकूर प्रसारित केल्याचे दिसून आले.
अशी झाली कारवाई
गोपनीय माहितीच्या आधारे ६ एप्रिल २०२६ रोजी दुपारी १२ वाजेच्या सुमारास पोलिसांनी इक्बालनगर येथील पाण्याच्या टाकीजवळ सापळा लावला. तेथे संशयास्पदरीत्या आढळलेल्या तरुणांची झडती घेतली असता, त्यांच्याकडे एक १७ इंच लांबीचा लोखंडी खंजर आणि रियलमी कंपनीचा मोबाईल मिळून आला. मोबाईलची तपासणी केली असता, त्यात शस्त्र विक्रीचे आणि वैमनस्य पसरवणारे व्हिडिओ व पोस्ट आढळून आल्या.
अटक करण्यात आलेले आरोपी:
१) शेख आदिल शेख शकील (वय २७ वर्ष, रा. रहितपूर, नांदेड)
२) शेख फरहान उर्फ चुहा पि. शेख शेरुन (वय २० वर्ष, रा. इक्बालनगर, नांदेड)
कायदेशीर कारवाई
या प्रकरणी पोलीस स्टेशन नांदेड ग्रामीण येथे गु.र.नं. ३३०/२०२६ नुसार भारतीय न्याय संहिता कलम ३५३(२) आणि शस्त्र अधिनियम कलम ३/२५, ७/२५, ४/२५ अन्वये गुन्हा दाखल करण्यात आला आहे. ही कारवाई पोलीस अधीक्षक अबिनाश कुमार, अपर पोलीस अधीक्षक अर्पणा पाटील, सुरज गुरव, आणि उपविभागीय पोलीस अधिकारी प्रशांत शिंदे यांच्या मार्गदर्शनाखाली पोलीस निरीक्षक ओमकांत चिंचोलकर व त्यांच्या पथकाने केली आहे.
समाज माध्यमांचा गैरवापर करून भीती पसरवणाऱ्यांची गय केली जाणार नाही, असा इशारा पोलीस प्रशासनाने दिला आहे.
वृत्त संकलन
प्रतिनिधी माधव वाघमारे
