नांदेड, दि. 16 नोव्हेंबर : (प्रतिनिधी) माधव वाघमारे नगर परिषद व नगर पंचायतींच्या सार्वत्रिक निवडणुकांसाठी नामनिर्देशनपत्र दाखल करण्याची प्रक्रिया आता अधिक सुलभ करण्यात आली आहे. राज्य निवडणूक आयोगाने जाहीर केलेल्या कार्यक्रमानुसार ऑनलाइन माध्यमातून स्वीकारली जाणारी नामनिर्देशनपत्रे संगणक प्रणालीतील अडचणीमुळे काही ठिकाणी अडथळ्यांना सामोरी जात असल्याचे निदर्शनास आल्यानंतर महत्त्वाचा निर्णय घेण्यात आला आहे.
शेवटचे दोन दिवस शिल्लक असताना संगणक प्रणालीवर वाढणारा भार, उमेदवारांना मिळणाऱ्या समान संधीचा विचार आणि प्रक्रियेची पारदर्शकता यांचा विचार करून आयोगाने सुट्टीच्या दिवशीही नामनिर्देशन दाखल करण्याची मुभा दिली आहे.
15 ते 17 नोव्हेंबर 2025 या तीनही दिवशी
रविवार, 16 नोव्हेंबर हाही समाविष्ट सकाळी 11 ते दुपारी 3 वाजेपर्यंत
उमेदवारांना ऑनलाइन तसेच ऑफलाइन दोन्ही पद्धतीने नामनिर्देशनपत्रे आवश्यक कागदपत्रांसह संबंधित निवडणूक निर्णय अधिकाऱ्यांकडे सादर करता येणार आहेत.
ही माहिती नगरपालिका प्रशासनाचे जिल्हा सहआयुक्त गंगाधर इरलोड यांनी प्रसिद्धीपत्रकाद्वारे दिली आहे.
या निर्णयामुळे उमेदवारांना दिलासा मिळणार असून नामनिर्देशन प्रक्रिया सुरळीत पार पडण्यास मदत होणार आहे.
