नांदेड 16 डिसेंबर (प्रतिनिधी) माधव वाघमारे जिल्ह्यातील लोहा तालुक्यातील माळेगाव येथे महाराष्ट्रातील लोकसंस्कृतीचा वारसा जपणारा माळेगाव यात्रा उत्सव दि. 18 डिसेंबर 2025 ते 25 डिसेंबर 2025 या कालावधीत मोठ्या उत्साहात साजरा होणार आहे. या यात्रेत परंपरा, कृषी, पशुसंवर्धन, महिला-बालकल्याण तसेच सांस्कृतिक कार्यक्रमांचा समावेश असून सर्व नागरिकांसाठी हा उत्सव पर्वणी ठरणार आहे.
या यात्रेचे उद्घाटन विविध धार्मिक व सामाजिक उपक्रमांनी होणार असून देव स्वारी व पालखी पूजन, कृषी प्रदर्शनाचे उद्घाटन, पशुधन व कुक्कुट प्रदर्शन, तसेच विविध स्पर्धांचे उद्घाटन करण्यात येणार आहे. यात्रेदरम्यान महिला व बालकांसाठी विशेष स्पर्धा, कनिष्ठ शेतकऱ्यांचा सत्कार, महिला आरोग्य शिबिर, लावणी महोत्सव, पशुसंवर्धन विषयक मार्गदर्शन, वृद्धांसाठी स्पर्धा, तसेच पक्षी वितरण कार्यक्रम आयोजित करण्यात आले आहेत.
यात्रेच्या समारोपप्रसंगी विविध उपक्रमांचा गौरवपूर्ण समारंभ होणार असून, लोकसंस्कृतीचा आनंद घेत सामाजिक सलोखा वृद्धिंगत करण्याचा हा प्रयत्न असल्याचे आयोजकांकडून सांगण्यात आले आहे.
या संदर्भात जिल्हा परिषदेच्या मुख्य कार्यकारी अधिकारी (सीईओ) श्रीमती मेघना कावली यांनी नांदेड जिल्ह्यातील सर्व नागरिकांना आवाहन केले आहे की, “माळेगाव यात्रा ही परंपरा, संस्कृती आणि विकास यांचा संगम आहे. नागरिकांनी सहकुटुंब येऊन या यात्रेचा आनंद घ्यावा व विविध उपक्रमांमध्ये सहभागी व्हावे.”
माळेगाव यात्रा उत्सवामुळे ग्रामीण संस्कृतीला चालना मिळून शेतकरी, महिला, युवक व बालकांसाठी प्रेरणादायी वातावरण निर्माण होणार आहे.
