नांदेड | ४ फेब्रुवारी प्रतिनिधी : माधव वाघमारे
शालांत प्रमाणपत्र परीक्षेतील सनदेमधील जन्मतारीख दुरुस्त करून देण्यासाठी लाच मागणाऱ्या शिक्षक व शिपायाविरोधात लाचलुचपत प्रतिबंधक विभागाने (एसीबी) कारवाई करत दोघांना रंगेहात पकडले. ही घटना नांदेड शहरातील सहयोग नगर परिसरात असलेल्या महात्मा कबीर विद्यालयात घडली असून, याप्रकरणी भाग्यनगर पोलीस ठाण्यात गुन्हा दाखल करण्यात आला आहे.
सविस्तर माहिती अशी की, तक्रारदाराने सन 2016 मध्ये दहावीचे शिक्षण पूर्ण केले होते. मात्र दहावीच्या शालांत प्रमाणपत्रावर तक्रारदाराची जन्मतारीख चुकीची नोंदविण्यात आली होती. ही चूक दुरुस्त करून घेण्यासाठी तक्रारदाराने महात्मा कबीर विद्यालयातील शिक्षक मनोहर शिंदे (रा. सहयोग नगर, नांदेड) यांच्याशी संपर्क साधला.
यावेळी शिक्षक शिंदे यांनी जन्मतारीख दुरुस्तीसाठी प्रथम 1,000 रुपये लाचेची मागणी केली. त्यानंतर पुन्हा 2,200 रुपये फोन-पे द्वारे स्वीकारले. एवढ्यावर न थांबता, 27 जानेवारी रोजी शिंदे यांनी तक्रारदाराच्या व्हॉट्सॲपवर आणखी 400 रुपये लागतील असा संदेश पाठवला.
30 जानेवारी रोजी तक्रारदाराने आपल्या वडिलांना शाळेत पाठवले असता, शिक्षक शिंदे यांनी “सनदेवर जन्मतारीख दुरुस्त झाली असून आणखी चारशे रुपये द्यावे लागतील,” अशी पुन्हा लाचेची मागणी केली. यामुळे तक्रारदाराने लाचलुचपत प्रतिबंधक विभागाकडे तक्रार दाखल केली.
तक्रारीच्या अनुषंगाने 2 फेब्रुवारी रोजी एसीबी पथकाने महात्मा कबीर विद्यालयात पडताळणी केली. त्यावेळी शिक्षक शिंदे यांनी “जन्मतारीख दुरुस्त झाली आहे, मुख्याध्यापकांकडून सनद घेऊन जा,” असे सांगितले. सनद मिळाल्यानंतर शाळेतील शिपाई सचिन शिवराम वार (रा. यशोधर नगर, जय हिंद पार्क, सिडको, नांदेड) याने तक्रारदाराकडे 400 रुपयांची मागणी केली.
तक्रारदाराने सध्या पैसे नसल्याचे सांगितल्यावर शिक्षक शिंदे यांनी फोन करून “फोन-पे वर टाक,” असे सांगितले. मात्र फोन-पे व्यवहार होत नसल्याने अखेर 3 फेब्रुवारी रोजी एसीबीने सापळा रचला. यावेळी शिक्षक मनोहर शिंदे व शिपाई सचिन शिवराम वार हे 400 रुपयांची लाच स्वीकारताना रंगेहात पकडले गेले.
या प्रकरणी दोघांविरोधात भाग्यनगर पोलीस ठाण्यात लाचलुचपत प्रतिबंधक कायद्यान्वये गुन्हा दाखल करण्यात आला असून, पुढील तपास सुरू आहे. शैक्षणिक संस्थांमध्ये घडलेल्या या लाचखोरीच्या प्रकारामुळे नागरिकांमध्ये तीव्र संताप व्यक्त केला जात आहे.
