मुखेड (नांदेड) ६ एप्रिल प्रतिनिधी
घरगुती वादातून पत्नीचा साडीने गळा आवळून खून करणाऱ्या नराधम पतीला मुखेड पोलिसांनी मोठ्या शिताफीने अटक केली आहे. गुन्हा केल्यानंतर फरार झालेल्या आरोपीला पोलिसांनी अवघ्या पाच तासांच्या आत शेत शिवारातून ताब्यात घेतले. मारोती रामकिशन उर्फ बाबाराव खांडेकर (वय ३५ वर्षे, रा. कर्णा, ता. मुखेड) असे अटक करण्यात आलेल्या आरोपीचे नाव आहे.
नेमकी घटना काय?
मिळालेल्या माहितीनुसार, मुखेड तालुक्यातील कर्णा येथील स्वाती मारोती खांडेकर यांचा संशयास्पद मृत्यू झाल्याची माहिती सोमवारी (दि. ६ एप्रिल) सकाळी ८ वाजेच्या सुमारास गुप्तबातमीदाराकडून पोलिसांना मिळाली होती. या माहितीवरून पोलीस पथकाने तत्काळ घटनास्थळी धाव घेतली. परिस्थितीचे गांभीर्य ओळखून फॉरेन्सिक टीमला पाचारण करण्यात आले आणि मृतदेह उत्तरीय तपासणीसाठी उपजिल्हा रुग्णालय, मुखेड येथे पाठवण्यात आला.
कौटुंबिक वादातून संपवले आयुष्य
मयत स्वाती यांचा भाऊ योगेश गणपत देवकत्ते (वय २७, रा. एकलारा) यांनी पोलीस ठाण्यात फिर्याद दिली. आरोपी मारोती हा पत्नीसोबत वारंवार भांडण करत असे. रविवारी रात्री आणि सोमवारी सकाळी ८ वाजेच्या दरम्यान त्यांच्यात पुन्हा कडाक्याचे भांडण झाले. याच वादाच्या भरात संतापलेल्या मारोतीने पत्नी स्वाती यांचा साडीने गळा आवळून खून केला आणि तो घटनास्थळावरून पसार झाला.
पाच तासांत पोलिसांची यशस्वी कारवाई
घटनेची माहिती मिळताच नांदेडचे पोलीस अधीक्षक अबिनाश कुमार यांनी आरोपीला तात्काळ अटक करण्याचे आदेश दिले होते. मुखेड पोलिसांनी तांत्रिक मदतीने आणि गोपनीय माहितीच्या आधारे आरोपीचा माग काढला. शेत शिवारात सुमारे तीन ते चार तास शोधमोहीम राबवून पोलिसांनी आरोपी मारोती खांडेकर याला बेड्या ठोकल्या.
या पथकाने केली कारवाई
ही कारवाई पोलीस अधीक्षक अबिनाश कुमार, अप्पर पोलीस अधीक्षक अर्चना पाटील (भोकर), सुरज गुरव (नांदेड), उपविभागीय पोलीस अधिकारी संकेत गोसावी यांच्या मार्गदर्शनाखाली मुखेड पोलीस ठाण्याचे पोलीस निरीक्षक लक्ष्मण केंद्रे, सपोनि जावेद शेख, उपनिरीक्षक गणेश माने, अभिजित तुतुरवाड, संदीप यामावार आणि त्यांच्या पथकाने केली. सायबर सेलचे राजेंद्र सिटीकर यांचेही या तपास कार्यात सहकार्य लाभले.
पोलिसांच्या या तत्परतेबद्दल पोलीस अधीक्षक अबिनाश कुमार यांनी तपास पथकाचे कौतुक केले आहे. या प्रकरणाचा पुढील तपास मुखेड पोलीस करत आहेत.
वृत्त संकलन
प्रतिनिधी माधव वाघमारे
