किनवट १७ ऑगस्ट/ नांदेड (प्रतिनिधी) माधव वाघमारे
सामूहिक वनहक्क प्राप्त गावांमध्ये वनहक्कांचे संवर्धन, शाश्वत व्यवस्थापन आणि गावांच्या सर्वांगीण विकासासाठी ‘सामूहिक वनहक्क संवर्धन व व्यवस्थापन आराखडा’ तातडीने तयार करा, असे स्पष्ट निर्देश जिल्हाधिकारी राहुल कर्डीले यांनी दिले आहेत.
किनवट येथील पंचायत समिती सभागृहात यासंदर्भात विशेष बैठकीचे आयोजन करण्यात आले होते. एकात्मिक आदिवासी विकास प्रकल्प, किनवटचे प्रकल्प अधिकारी तथा सहाय्यक जिल्हाधिकारी बी. सरवनन यांच्या कुशल नियोजनातून ही बैठक पार पडली.
वनसंपत्तीचे संवर्धन आणि शाश्वत नियोजन
बैठकीत उपस्थितांना मार्गदर्शन करताना जिल्हाधिकारी राहुल कर्डीले यांनी सांगितले की, सामूहिक वनहक्क व्यवस्थापन समित्यांच्या माध्यमातून उपलब्ध नैसर्गिक साधनसंपत्तीचे योग्य व शाश्वत व्यवस्थापन होणे गरजेचे आहे. ग्रामस्थांचा थेट आणि सक्रिय सहभाग घेऊन वनसंपत्तीच्या संवर्धनासोबतच स्थानिकांच्या उपजीविकेच्या साधनांचा विकास करण्यावर प्राधान्याने भर दिला पाहिजे.
सामूहिक वनहक्कांचा आराखडा लवकरात लवकर तयार करून त्यासंदर्भातील आवश्यक ती सर्व कायदेशीर व प्रशासकीय कार्यवाही तात्काळ पूर्ण करण्याच्या सूचना त्यांनी संबंधित यंत्रणेतील अधिकाऱ्यांना दिल्या.
“सामूहिक वनहक्क प्राप्त गावांचा आराखडा तयार करताना ग्रामस्थांचा सक्रिय सहभाग अत्यंत महत्त्वाचा आहे. वनसंपत्तीचे जतन आणि उपजीविकेच्या साधनांची निर्मिती या दोन्ही बाबींना प्रशासनाचे प्राधान्य राहील.” — राहुल कर्डीले, जिल्हाधिकारी, नांदेड.
प्रमुख अधिकाऱ्यांची व मान्यवरांची उपस्थिती
या बैठकीला प्रशासकीय अधिकारी व सामाजिक क्षेत्रातील मान्यवर मोठ्या संख्येने उपस्थित होते. यामध्ये प्रामुख्याने:
- बी. सरवनन (सहाय्यक जिल्हाधिकारी तथा प्रकल्प अधिकारी)
- डॉ. शारदा चौंडेकर (तहसीलदार)
- जयश्री वाघमारे (गट विकास अधिकारी)
- धीरज मदने (वनपरिक्षेत्र अधिकारी)
- उत्तमराव सुपाते (प्रांत उपाध्यक्ष, देवगिरी कल्याण आश्रम)
- डॉ. उत्तम धुमाळे, तुकाराम पेंदोर (किनवट), नमिता गेडाम, गजानन डवरे
- विश्वनाथ पधाने (जिल्हा सचिव) आणि जिल्हा वनहक्क समितीचे इतर सदस्य.
या बैठकीच्या माध्यमातून किनवट तालुक्यातील सामूहिक वनहक्क प्राप्त गावांच्या विकासाला आणि वनसंवर्धनाला नवी दिशा मिळण्याची शक्यता व्यक्त केली जात आहे.
