नांदेड १५ डिसेंबर माधव वाघमारे जिल्ह्यातील सार्वजनिक ठिकाणे व बाजारपेठांमधून हरवलेले व चोरीस गेलेले महागडे मोबाईल शोधून काढण्यात नांदेड पोलिसांना मोठे यश मिळाले आहे. मोबाईल मिसिंग मोहिमेअंतर्गत तब्बल 202 अँड्रॉईड मोबाईल फोन, एकूण 30 लाख 49 हजार रुपये किंमतीचे, हस्तगत करण्यात आले आहेत.
माननीय पोलीस अधीक्षक नांदेड यांच्या आदेशानुसार व पोलीस निरीक्षक वसंत सत्रे यांच्या मार्गदर्शनाखाली नांदेड जिल्ह्यातील सर्व पोलीस ठाण्यांनी स्वतंत्र पथके तयार करून हरवलेल्या मोबाईलचा शोध घेण्याची विशेष मोहीम राबवली. सायबर तांत्रिक विश्लेषण व IMEI क्रमांकांच्या आधारे ही कारवाई यशस्वीरीत्या पार पडली.
या मोहिमेत सापडलेले सर्व 202 मोबाईल आज एकत्रितपणे माननीय पोलीस अधीक्षक साहेबांच्या हस्ते संबंधित नागरिकांना परत करण्यात आले. हरवलेले मोबाईल परत मिळाल्याने नागरिकांमध्ये समाधान व आनंदाचे वातावरण निर्माण झाले आहे.
तसेच सापडलेल्या मोबाईलचे IMEI क्रमांक नांदेड पोलीस दलाच्या अधिकृत “Nanded Police” फेसबुक पेजवर प्रसिद्ध करण्यात आले आहेत. नागरिकांनी हरवलेल्या मोबाईलची माहिती CEIR पोर्टलवर अपलोड करावी, असे आवाहन माननीय पोलीस अधीक्षक नांदेड यांनी केले आहे.
ही उल्लेखनीय कामगिरी माननीय पोलीस अधीक्षक अबिनाश कुमार, अपर पोलीस अधीक्षक भोकर मा. श्री.अर्चना पाटील, अपर पोलीस अधीक्षक मा श्री सुरज गुरव, पोलीस उपअधीक्षक डॉ. आश्विनी जगताप यांच्या मार्गदर्शनाखाली तसेच सायबर व पोलीस ठाणे सायबर पथकातील अधिकारी व अंमलदारांच्या मेहनतीमुळे शक्य झाली आहे.
या यशस्वी मोहिमेबद्दल माननीय पोलीस अधीक्षक अबिनाश कुमार यांनी सर्व अधिकारी व कर्मचाऱ्यांचे अभिनंदन केले असून, भविष्यातही अशाच प्रभावी मोहिमा राबवण्यात येणार असल्याचे सांगितले आहे.
