नांदेड, दि. ३१ डिसेंबर (प्रतिनिधी) माधव वाघमारे
आगामी महापालिका निवडणुकीत शहरात शंभर टक्के मतदान व्हावे, यासाठी नांदेड वाघाळा शहर महानगरपालिकेच्या वतीने विविध जनजागृती उपक्रम राबविण्यात येत आहेत. याच उपक्रमांचा भाग म्हणून महापालिकेच्या मुख्य कार्यालयात ‘मी मतदान करणारच’ या संकल्पनेवर आधारित मतदान संकल्प स्वाक्षरी अभियान व सेल्फी पॉइंटची निर्मिती करण्यात आली असून, या सेल्फी पॉइंटचे उद्घाटन मुख्य निवडणूक निरीक्षक नतिशा माथूर (भा.प्र.से.) यांच्या हस्ते आज करण्यात आले.
महापालिका आयुक्त तथा निवडणूक अधिकारी डॉ. महेशकुमार डोईफोडे यांच्या संकल्पनेतून हा अभिनव उपक्रम साकारण्यात आला आहे. यावेळी बोलताना आयुक्त डॉ. डोईफोडे म्हणाले की, “लोकशाहीमध्ये मतदान हा नागरिकांचा मूलभूत अधिकार असून तो प्रभावीपणे वापरणे ही प्रत्येकाची जबाबदारी आहे. योग्य, कार्यक्षम व समाजाभिमुख प्रतिनिधी निवडण्यासाठी जास्तीत जास्त मतदान होणे अत्यंत आवश्यक आहे. मतदानाच्या दिवशी सहल, प्रवास किंवा उदासीनता न दाखवता प्रत्येक मतदाराने आपला हक्क बजावावा.”
मुख्य निवडणूक निरीक्षक नतिशा माथूर यांनी यावेळी उपस्थित अधिकारी-कर्मचाऱ्यांना संबोधित करताना सांगितले की, भारत ही जगातील सर्वात मोठी लोकशाही व्यवस्था आहे. ही लोकशाही अधिक सक्षम ठेवण्यासाठी मतदारांचा सक्रिय सहभाग अत्यंत महत्त्वाचा आहे. शासकीय अधिकारी व कर्मचाऱ्यांनीही मतदानासाठी पुढाकार घेऊन समाजात सकारात्मक संदेश द्यावा, असे आवाहन त्यांनी केले. स्वाक्षरी अभियान व सेल्फी पॉइंटसारखे उपक्रम मतदानाबाबत जनजागृती निर्माण करण्यासाठी निश्चितच उपयुक्त ठरणार असल्याचेही त्यांनी नमूद केले.
या कार्यक्रमास सहाय्यक निवडणूक निरीक्षक महेंद्रकुमार कांबळे, अतिरिक्त आयुक्त गिरीश कदम व निलेश सुकेवार, उपायुक्त अभिजित वायकोस, नितीन गाढवे, स. अजितपालसिंघ संधु, शहर अभियंता सुमंत पाटील, कार्यकारी अभियंता संघरत्न सोनसळे, दिलीप टाकळीकर, वैद्यकीय आरोग्य अधिकारी डॉ. हनुमंत रिठ्ठे, सहाय्यक आयुक्त मो. गुलाम सादेक, शिक्षणाधिकारी नागराज बनसोडे, सिस्टीम मॅनेजर सदाशिव पतंगे, जनसंपर्क अधिकारी सुमेध बनसोडे, भांडारपाल नागनाथ पतंगे, स्वीय सहाय्यक महेश आसणे तसेच महापालिकेचे अधिकारी व कर्मचारी मोठ्या संख्येने उपस्थित होते.
या सेल्फी पॉइंटद्वारे नागरिक, अधिकारी व कर्मचारी ‘मी मतदान करणारच’ असा संकल्प करून सेल्फी घेऊन तो संदेश समाजमाध्यमांवर प्रसारित करणार असून, त्यामुळे शहरात मतदानाविषयी सकारात्मक वातावरण निर्माण होण्यास मदत होणार आहे.
