नांदेड २९ जून प्रतिनिधी
जिल्ह्यात अवैध शस्त्र बाळगणाऱ्यांवर आणि बेकायदेशीर धंद्यांवर वचक निर्माण करण्यासाठी नांदेडचे पोलीस अधीक्षक डॉ. नीलाभ रोहन यांच्या मार्गदर्शनाखाली विशेष मोहीम हाती घेण्यात आली आहे. या मोहिमेत अंतर्गत इतवारा पोलीस ठाण्याच्या गुन्हे शोध पथकाने धडक कारवाई करत एका इसमाला देशी बनावटीच्या अवैध अग्निशस्त्रासह (पिस्तुल/कट्टा) अटक केली आहे. त्याच्याकडून २५,००० रुपये किमतीचा मुद्देमाल जप्त करण्यात आला आहे.
गोपनीय माहितीच्या आधारे सापळा
दिनांक २९ जून २०२६ रोजी इतवारा पोलीस ठाण्याचे पोलीस निरीक्षक रामेश्वर खनाळ हे आपल्या पथकासह पोलीस ठाण्याच्या हद्दीत गस्त घालत होते. गस्तीदरम्यान त्यांना एका विश्वसनीय गोपनीय सूत्राकडून खात्रीशीर माहिती मिळाली की, चौफाळा भागातील भोई गल्ली येथे एक संशयित तरुण बेकायदेशीरपणे शस्त्र बाळगून थांबला आहे.
माहिती मिळताच पोलीस निरीक्षक रामेश्वर खनाळ यांनी वेळ न गमावता गुन्हे शोध पथकाला तात्काळ कारवाईचे आदेश दिले. पोलिसांनी भोई गल्ली, चौफाळा येथे अचानक धाड टाकून संशयित इसम हर्ष जगदीश कोकरे (रा. भोई गल्ली, चौफाळा) याला ताब्यात घेतले.
अंगझडतीत सापडले अग्निशस्त्र; गुन्हा दाखल
पोलिसांनी दोन पंचांसमक्ष हर्ष कोकरे याची अंगझडती घेतली असता, त्याच्याकडे देशी बनावटीचे अवैध अग्निशस्त्र आढळून आले. पोलिसांनी सदर २५,००० रुपये किमतीचे शस्त्र जप्त केले असून, आरोपीविरुद्ध इतवारा पोलीस ठाण्यात गु.र.नं. २२८/२०२६, कलम ३/२५ भारतीय हत्यार कायद्यानुसार (Arms Act) गुन्हा दाखल केला आहे.
या वरिष्ठ अधिकाऱ्यांच्या मार्गदर्शनात झाली कारवाई
सदर यशस्वी कारवाई पोलीस अधीक्षक डॉ. नीलाभ रोहन, अपर पोलीस अधीक्षक (भोकर) श्रीमती अर्चना पाटील, अपर पोलीस अधीक्षक (नांदेड) श्री सुरज गुरव, आणि उपविभागीय पोलीस अधिकारी (इतवारा विभाग) मा. प्रशांत शिंदे यांच्या मार्गदर्शनाखाली पार पडली.
तसेच या कारवाईत इतवारा पोलीस ठाण्याचे पोलीस निरीक्षक रामेश्वर खनाळ, संजय शिंदे, पो.उप.नि. जळबाजी गायकवाड, चासपोउपनि/जावेद अहमद, पो.हे.कॉ. बंडु कलंदर, जगन्नाथ केंद्रे, पो.कॉ. इसराईल शेख, साहेबराव जगताप, आणि बजरंग बोडके व इतर सर्व कर्मचाऱ्यांनी महत्त्वाची भूमिका बजावली.
पोलीस प्रशासनाचा कडक इशारा
जिल्ह्यात अवैध शस्त्र बाळगणे, वाळूचे बेकायदेशीर उत्खनन व वाहतूक, अवैध दारू विक्री, जुगार, गुटखा विक्री यासारखे अवैध व्यवसाय करणाऱ्यांची गय केली जाणार नाही. भविष्यात अशा गुन्हेगारांवर अधिक कठोर कारवाया केल्या जातील, असा स्पष्ट इशारा नांदेड पोलीस प्रशासनाने दिला आहे.
– विशेष प्रतिनिधी, माधव वाघमारे
